Daghang misimpatiya sa Carmelite sisters

Natural nga mokondena gyod ang mga madre sa Carmelite Monastery human makita ang trailer sa Maid in Malacañang movie, diin sa usa ka eksena nakigdulag mahjong si Corazon ‘Cory’ C. Aquino sa tulo ka madre panahon sa People’s Power didto sa kaulohan.

Matud pa, usa ka adlaw rang mi-estar-tago si Cory sa Carmelite Monastery sa dakbayan sa Sugbo sugod sa Pebrero 22, 1986 sa gabii. Kay nianang pagka ugma, Pebrero 23, mibalik na man kini ngadto sa Manila.

Segurista ang mga kadagkoang supporter ni Cory. Dihang nasutang wala na mag-atubang og kakuyaw ang kinabuhi niini, gikuha nila si Cory ug gidala-balik sa Manila. Gani, seguradong giandaman pa nilag comfort zone, diin adto nila kini itago-paestara.

Si kanhi Senador Juan Ponce Enrile mimatuod nga si Cory hilig modulag mahjong. Basin baya tuod og nakigmadiyong si Cory uban sa iyang mga suod didto mismo sa maong comfort zone?

Nga sa ato pa, kon nagmadiyong man tinuoray si Cory, sa Manila na. Ug dili sa Carmelite Monastery. Angay hinumdoman, nga halos tanang higayon, ang gunitan kanunay sa mga mongha pulos rosaryohan, bibliya ug lainlaing relihiyosong basahon.

Sila pirmeng nag-ampo, nagpuasa ug naghimog nagkadaiyang sakripisyo alang sa kalinaw sa nasod ug katawhan. Ingon niini kabalaan ang ilang adlaw-adlawng naandan sulod sa ilang monasteriyo. Busa, gisakitan sila sa bakakon kunong trailer nga gipasalida sa Maid in Malacañang.

Hinuon, sa gipangsul-ob pa lang nga kinaiya ug religious habits sa mga madre sa pelikula, nagtug-an nga dili kini ilaha. Sa laktod, klarong dili sila maoy gitumbok. Lain nga congregation. Pero pagka ngan nga sila madre usab, ma-hurt gayod sila.

Gipasiatab baya ni Director Darryl Yap, nga matag eksena kuno sa maong pelikula, may iyaiyang dokumentong mosuporta niini. May ikapakita ba siyang usa nga makamatuod nga nagmadiyong gyod si Cory ug mga madre panahon sa kataposang 72 ka oras nga pag-estar sa Malakanyang sa pamilyang Marcos?

Direk Darryl, daghang nagmahal sa kamatuoran ang misimpatiya sa gipadayag sa Carmelite sisters. Mahimo bang iladlad nimo ang kasaligang ebedensiyang momatuod sa esenang nakigdulag mahjong si Cory sa mga madre?

Niini lang paagiha makita kinsay nagsulti sa tinuod: ikaw ba, o ang Carmelite sisters?