EDITORYAL - Dedikasyon ni Labella

Nawad-an na sab og laing tigpangalagad publiko ang Sugbu sa pagtaliwan ni Cebu City Mayor Edgardo Labella kagahapon sa kaadlawon sa edad nga 70.

Si Labella hagbay rang nagsulod gawas sa tambalanan tungod sa iyang pneumonia ug impeksyon sa iyang dugo.

Ang mitaliwang mayor bisan pa man siya dili perpekto apan usa siya sa mga dunay labing maayong rekord sa pagpanerbisyo sa publiko dinhi sa Sugbu gikan sa pagka-kanhi Ombudsman hangtud sa pagkahimo niyang politiko.

Gani iyaha kining gipamatud-an dihang nihugpa sa siyudad ang pandemiya sa Covid-19.

Bisan sa iyang pangidaron ug nasayod ng daan sa iyang gihambing balatian, niserbisyo siya sa mga Sugboanon subay sa mandato sa mga nibotar kaniya niadtong 2019. Dedikasyon sa trabaho ang iyang gipakita.

Maisip kadto nga labing lisod nga hagit para sa usa ka mayor sa iyang sitwasyon, apan wala siya motalaw hangtud nga nalupig iyang panglawas ug nagbalik-balik na sa tambalanan.

Ug bisan pa niini, may pipila gihapon ka higayon siyang mibalik og trabaho diha lang sa balay ug bisan sa city hall bisan supak ang iyang mga doktor, usa kini ka hiyas sa usa ka tinuoray nga lider, may dedikasyon sa trabaho.

Human sa iyang pagka-Ombudsman, gitaak ni Labella ang politika niadtong  tuig 1998 hangtud 2001 ug subling gipalingkod sa katawhan 2004 hangtud 2013 isip konsehal sa siyudad.

Sa wala pa nahimong mayor si Labella, nagsilbi na siya isip konsehal sa Cebu City North District niadtong 1998 ngadto sa 2021, ug dugang termino gikan sa 2004 hangtud sa 2013.

Nagsilbi usab siya nga bise mayor gikan sa 2013 hangtod sa 2019 hangtud napili nga mayor.

Dunay maayong legasiyang gibilin si Labella para sa mga Sugbuanon, dili kinahanglang perpekto basta tinuoray ang dedikasyong moserbisyo.