Tinuod nga alas ni Pres. Duterte
Duna gyoy namilok, ug dili ang anak. Napamatud-an ni Davao City Mayor Sara Duterte Carpio nga mas lig-on siya og tuhod kay sa iyang amahan. Si Presidente Duterte, nga nagpatuo nga labing mat-an sa politika, napugos pagpahibawo og desperadong plano nga nalabwan lang sa aktuwal niyang gihimo.
Di hinuon ikapasigarbo sa anak nga siya ang mas bagis. Kay aron pagsukwahi sa bisan unsang sugo nga gipamugos niya nigakos siya sa duha ka politikanhong puwersa nga posibleng mao ray makaambas sa pinatyanay ug kinawatay nga gipasangil sa pamunoan sa iyang amahan.
* **
Ang pagdagan ni Presidente Duterte pagka senador nisukwahi sa tanan niyang pasiatab:
- Nga inutil ang Senado, kansang mga lalis ug mga imbestigasyon pulos pamolitika nga way kapuslanan ug way kaayuhan nga mahatag sa katawhan; ug
- Kon sayop ang iyang unang pagtuo nga duna siyay immunity kon mag bise presidente, ang ikaduhang labing taas nga opisyal sa nasud sunod sa presidente, labi pang way panagang batok sa magbaha nga mga kaso bisan makumbinser ang mga senador pagpili niya nga sunod nga Senate president, nga ikatulo ra sa line of succession.
* * *
Ang PDP-Laban maoy labing nagay-ot sa bugno sa amahan ug anak: Gikan sa pagka labing inilogan pila ka semana ang nilabay karon way maangkon nga mga piliunon sa duha ka labing taas nga katungdanan:
- Si Senador Manny Pacquiao nga mao untay presidente sa PDP-Laban nidagan pagka presidente ubos sa Promdi;
- Si Sara nisalikway sa PDP-Laban ug nidagan pagka bise presidente ubos sa Lakas-CMD;
- Si Senador Bong Go nibiya sa PDP-Laban ug nidagan pagka presidente ubos sa PDDS; ug
- Si Presidente Duterte nibiya sa PDP-Laban ug nidagan pagka senador ubos sa PDDS.
* * *
Pero para sa mga dumadapig ni Presidente Duterte duna pa siyay alas: Lapas sa Nobyembre 15 mahimong mo-withdraw si Sara pagka bise presidente; kapulihan sa pareha niya og apelyido; ug pareha niyag apelyido ang iyang amahan.
Kon modaog pagka bise presidente, unsa may dag-anan ni Presidente Duterte kon himuon siya nga laing Leni Robredo sa bag-ong presidente? Para sa iyang mga dumadapig, mao ni tinuod niyang alas: Ang iyang mayoriya sa Comelec ug Korte Suprema maoy garantiya nga siya ang magbuot kinsay sunod nga presidente.
* * *
- Latest
