^

Buhat ni Sir Dodong nga makapalangit

JAV, BANATI! - Javier Tapulado (Banat) - March 5, 2021 - 12:00am

May dato kaaayong batan-ong ulitawo nangutana ni Hesus: “Maayong magtutudlo, unsa bay akong buhaton aron ako makasulod sa Langit?”

Gitubag-sukna siya ni Hesus: “Imo bang gituman ang tanang sugo sa Ginoo?” Diin, daling nakatubag ang batan-on: “Oo, sukad niadtong bata pa ko.”

Pero giingnan siya ni Hesus: “May usa nga nakulang nimo. Lakaw, ibaligya ang tanan mong kabtangan, ihatag ang halin ngadto sa mga kabus ug maangkon mo ang mga bahandi sa langit. Unya, balik ngahi ug sunod nako.” Sa pagkadungog ini, naguol siya ug milakaw nga masub-anon kay dato man siya kaayo. (Marcos 10:21-22).

Niadtong buhi pa si Jose “Sir ‘Dodong” R. Gullas, seguradong nabangalan sab niya kining maong ebangheliyong makapahalangit sa mga tawong adunahag kasingkasing.

Wala man tuod ibaligya tanang bahandi ni Sir Dodong, apan lahi sa gibuhat sa batan-on, wala talikdi ni Sir Dodong ang matinud-anong awhag ni Hesus nga mao ang pagtugyan sa kinatibuk-an niyang kaugalingon alang sa pagpangalagad sa katawhan.

Bisag nahitalay ang ilang pamilya sa hataas hut-ong sa katilingban, wala niya puy-i ang kahabog. Siya ang nanaog sa ubos aron sayon siyang makuhit-duol nilang nanginahanglan ug iyang mapaambit kadtong matang sa bahandi nga giingon ni Hesus: “Ihatag ang halin sa mga kabos.”

Tanang hinabang nga natunol ni Sir Dodong sa atong kinapobrehang kaigsonan hangtod sa mga dagkong simbahan, halin kadto gikan sa iyang mga patigayon ug kahago. Sa walay pagpanuko, gusto niyang ihatag-paambit tanan. Apan imbes mahurot, midaghan hinuon. Ngano? Ania ang tubag-pahayag ni Kristo:

“Gihatag kaninyo ang kahibalo sa mga sekreto sa gingharian sa Langit. Dili niining mga tawhana. (Ang Iyang ipasabot, kadtong mga tawong walay pulos.) Kay ang adunay iyaha, dugangan pa ug mahamugaway. Apan ang walay iyaha, kuhaon ang bisan ang naa niya. (Mateo 13:11-12)

Pagdalikyat namog adto ni misis sa haya ni Sir Dodong didto sa Crystal Palace human sa gitambongan namong Sunday 6:30am mass, Pebrero 28 sa Guadalupe Parish Church, sa hilom mihalad kog kinasingkasing pag-ampo atubangan sa iyang lungon. Nakurat ko! Ang rosaryohan ug libretong iyang gigunitan, adunay miamag - bugnaw kaayong kahayag. Mapahiyomon.

Tingale, tungod sa mga maayong buhat nga iyang gibilin dinhi sa kalibotan. Mga buhat, nga makapahalangit!   

DODONG
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with