Tuig bag-o, may nagbag-o, may wala

Komusta, mga Tsong, mga suking magbabasa ning atong pinanggang The Freeman Banat News tabloid? Salamat diay, nga bisag dugay nang gikusokuso atong ekonomiya sa mangtas nga pandemiya, migahin gihapon kamog panahon pagsapnay-bukhad sa matag panid niini.

Ang makanunayon ninyong paghapupap maoy adlaw ug ulan nga migalam-alima pag-ayo sa matag dahon sa TF Banat News aron padayon ang pagpamulak-pamunga ug pagpangalagad niini taliwala ning dakong krisis nga atong giatubang.

Diin, kining atong pobreng nasud nahilukapag samot. Dili lang tungod sa COVID-19. Kondili, tungod sa walay hunong korapsiyon halos sa tanang ahensiya sa atong gobiyerno.

Himatikdan, nga dili gyod maulaw-maikog ni Presidente Rodrigo Roa Duterte ang gipangpili niyang mga dagkong opisyal, kinsa morag alimatok, mipilit hinuog samot sa puwesto, bisag nasakpan nang nahilambigit sa nagkadaiyang grabeng korapsiyon.

Pipila na ka senador ug kongresista ang mihangyo ni Duterte nga ipatangtang na kining mga kiriwan. Pero, dili gyod madutlag ulaw, uy!  Labi na, kay mopakitag depensa ang presidente pinaagi sa pag-ingon, nga bisan pa sa mga kontrobersiyal nga isyu, misalig gihapon siya nila.

Sila ang miunay pagguba sa matahom imahe ni Duterte nga iyang gitukod sukad niadtong nagpapili pa siya pagkapangulo sa Pilipinas ug hangtod karon nga siya na gyoy milingkod sa Malakanyang. Ang kanhi ‘Change is coming,’ karon nahimo nang ‘Change comes true.’

Apan kining tanang kabag-ohan nga nahimo ni Duterte wala makita sa tanang oposisyonista, dilawan ug komunistang grupo. Apil na niini, kadtong mga pasawayng opisyal, kinsa mipahimulos-abuso sa pagkamaayong higala ni Duterte, diin kon ikaw tinuoray niyang amigo, iyaha gyong duphan ug pakamatyan.

Mga kamandag sila sa katilingban nga angay isalikway. Sanglit, gihatagan na kita sa Ginoo og presidenteng mobag-o sa kahimtang natong mga kabos. Pero unsay nahitabo?

Pirme hinuong gisaway-kontra nilang nagpakaaron-ingnong Human Rights Defenders, kansang mga gamot nga nagtago ilawom sa yuta, kauban ra diay sa tanang daotang sagbot, diin bisag kanus-a, walay kaayohang mahatag sa katawhan.

Ning Bag-ong Tuig 2021, liboang NPA ang misurender aron magbag-o.  Apan ang mga nagmaskarang lider sa atong nasud, kinsa gitudlo nilang ila rang mga kauban kanhi, wala gyoy senyales nga mobiya sa ilang pagsigeg babag sa tanang nindot programa ni Duterte. Pastilan, pagkatibay!