Mahimong nanakod na dinhi
Unahon nato ang di maayong balita ning bag-ong bersiyon sa SARS-CoV-2, ang kagaw nga mosangpot sa COVID-19: Nitapot na sa pipila ka molupyo sa atong silingang mga nasud sa Singapore, Hong Kong, Japan ug Australia. Dako ang kahigayonan nga niabot ug nanakod na sab sa Pilipinas.
Ang alas sa Britanya nga maoy labing una nga nakabantay sa bag-ong variant sa kagaw mao ang agresibo niyang sistema pagsubay sa kagaw—pagsusi sa 10% sa tanang kaso—maong dali nga namatikdan ang bisan unsang kausaban. Nakatag-an ka, way katakos paghimo ini ang atong nasud.
* * *
Laing di maayong balita: Ang bag-ong variant sa Britanya 70% nga mas mananakod kay sa orihinal nga kagaw ug gikabalak-an nga mao say abilidad sa laing variant gikan sa South Africa.
Gidudahan ang bag-ong variant ang gidudahang responsable sa pagsulbong sa bag-ong mga kaso sa California.
Nangagpas ang mga eksperto nga ang kausaban sa kagaw nahitabo sud sa lawas sa mga biktima nga luya ang immune system ug busa wa kabadlong sa kagaw sa pagpatuyang pag-usab sa iyang kaugalingon aron nga mas dako ang kahigayonan sa pagtakod ug paglahutay.
* * *
Apan ang maayong mga balita nga angayng makaiban sa kalibotanong kahadlok nga nagpabilin ta nga inutil sa pandemiya: Ang bag-ong variant sa SARS-CoV-2 di mohimo sa mga pasyente nga mas grabe ug way timaan nga makadugang sa kamatayon; ug
Pasiuna nga mga pagtuon nagpakita nga ang bag-ong bersiyon sa kagaw way katakos sa paglusot sa duha ka bakuna sa Pfizer-BioNTech ug Moderna nga gitugotan na sa nagkalainlain nga mga nasud sa kalibotan.
* * *
Mahingpit sa mosunod nga duha ka semana ang mga pagtuon unsa ka-epektibo ang mga bakuna batok sa bag-ong variant.
Kon simbako mapamatud-an nga di hingpit nga makasagang, matinuod ang kahingawa nga mahisama ni sa flu nga magsige og usab ug busa kinahanglan tang magpabakuna matag tuig.
Sa kasamtangan, gipahinumdoman ta sa mga eksperto nga ang dag-anan batok sa kagaw—daan o bag-o man—mao ang napamatud-ang kinakusgan nga mga panagang: Pagsige og panghunaw; pagsul-ob og face mask kon manggawas sa bay; paglikay sa baga nga duot sa katawhan; ug pagpalayo og usa ngadto sa duha ka metro labi na gikan sa mga may sip-on ug ubo.
* * *
- Latest
