Kalibotanong kaguliyang sa bakuna
ARANGKADA - Leo Lastimosa (Banat) - September 21, 2020 - 12:00am

Napaluhod ang kalibotanong ekonomiya sa pandemya sa COVID-19. Gikabalak-an nga moulbo ang mas lapad nga kaguliyang kon may mamugna nang bakuna o mga bakuna: Ang adunahang mga nasud maneguro pag-una sa ilang mga molupyo; samtang ang higanteng mga kompaniya mopalabi sa pagpaburot sa ilang ginansiya.

Gibutyag sa Oxfam, ang kalibotanong kahugpongan nga determinado nga nakiglambigit sa 90 ka nasud aron paghaw-as sa ilang katawhan gikan sa kakabos, nga nasipong nang sobra sa katunga (51%) sa kandidatong mga bakuna sa adunahang mga nasud nga pinuy-anan sa 13% lang sa kalibotanong populasyon.

* * *

Di mosugot ang mga molupyo sa kabos nga mga nasud nga magpaantaw lang sa layo, magpatubod lang sa laway nga magtan-aw nga maglumba na og pamakuna sa ilang katawhan ang Estados Unidos, Britanya ug ubang kanasuran ug magpaabot lang kanus-a piskan sa salin nga mumho.

Gawas nga di mahimong mangandado ang adunahang kanasuran aron nga di makasud ang kabos nilang mga silingan nga wa pay bakuna, ang mosulbong nga panagsungi gikabalak-an nga makapatumaw sa mas lapad nga pag-iyahay ug manguhong ang mas radikal nga mga pundok ug mas duguon nga terorismo.

* * *

Di lisod sa higanteng mga kompaniya sa tambal sa paggakos sa ginansiya kay sa pag-apud-apod sa bakuna sa labing nagkinahanglang mga molupyo:

Binilyon ka dolyar ang gasto sa paglusad og mga pagtuon sa mga kandidatong bakuna;

Gamay rang ginansiya kay kasagaran sa nagkinahanglan maong mga molupyo sa labing kabos nga mga nasud nga di kaabot kon patas-ang presyo; maong

Nangontrata nang daan sa adunahang mga nasud bisan wa pay klaro maaprobahan bang ilang bakuna.

* * *

Pabiling nagpakabungol silang US President Donald Trump ug ubang mga pangu sa awhag nga makighiusa sa World Health Organization (WHO) pagtino nga managsamang mabakunahan ang mga molupyo sa kabos ug adunahang mga nasud.

Bisan si Trump ray nag-atubang og piniliay karong Nobyembre 3, ang ubang mga pangu mga politiko sab nga nagtuo nga mas mahinungdanon ang mga botante sa ilang mga nasud.

Hinikalimtan ang di malalis nga kamatuoran nga makalingkawas lang ang kalibotan ning pandemya kon ang kinabag-an sa labing kabos nga mga molupyo sa labing kabos nga mga nasud may panagang na sab batok sa COVID-19.

* * *

leolastimosaa@gmail.com

BAKUNA
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with