EDITORYAL - Hain na ang UP PCR test kits?

Dako kaayo ang gastos sa gobiyerno sa kombate niini batok sa novel coronavirus disease. Bilyones ka pesos na ang gipagawas gikan sa pagpalit sa mga facemask, PPEs, test kits, mga medical equipment sama sa ventilators, respirators ug ang mahal kaayong polymerase chain reaction (PCR) test kits nga kadaghanan imported pa.

Apan sa pagdagan sa mga buwan wala nagkadako ang pundo sa gobiyerno tungod kay nihunong man sab ang ekonomiya mao nga kun asa makadaginot, adto unta ang gobiyerno.

Kaning PCR test kits sa University of the Philippines National Institutes of Health nga gipaluyohan sa Department of Science and Technology ug ang Manila Healthtek maoy nag-prodyus dako kaayo og matabang sa gobiyerno kun maoy gamiton.

Mapalapdan ug mapangusgan niini ang testing capacity sa nasud tungod kay makamenus man sa presyo tungod kay nagkantidad lang og P1,320 matag usa, samtang ang gikan sa China ug South Korea nagkantidad og P4 mil ngadto sa P8 mil matag usa.

Gawas pa, giingon nga mas sensitibo pa kini sa ubang imported PCR test kits.

Aprubado na sa Food and Drugs Administration ang paggamit niini apan gipahunong niadtong Mayo tungod matud pa dunay ‘ gamay nga depekto’ nga nabantayan ang Research Institute of Tropical Medicine.

Sa pamahayag sa DOH pinaagi ni Undersecretary Maria Rosario Vergeire nakorihian na kini ug gikatakda ng gamiton pagbalik. Apan kanus-a kaha?

Husto ang pagkwestyon sa mga minoriyang senador nga silang Franklin Drilon, Risa Hontiveros ug Kiko Pangilinan sa pamunoan Health Sec. Francisco Duque III nganong hangtud karon wala pa gipaspasan ang paghimo sa maong mga test kits.

Miabot na hinuon sa punto nga nakapangutana sila kun duna bay nakakwarta sa mga imported test kits.

Ang madaginot nga pundo mapalit pa og mas daghang test kits para sa mga kabus nga pasyente.

Gawas nga barato kini, dako ang purohan nga ma-export kini ngadto sa ubang mga nasud nga nagkinahanglan niini sanglit kining pandemiya dili pa gyud kini mahunong pagsanay hangtud nga way bakunang madiskubrehan.

Ang ekonomiya sa nasud nagtinga na, ang pagdaginot makatabang kaayo aron molahutay.