Tug-an sa tinuod
JAV, BANATI! - Javier Tapulado (Banat) - July 6, 2020 - 12:00am

Ang katinuod maoy sugang mohatag og kahayag sa kangitngit. Kon takpan sa kangitngit ang kahayag, dulom ang dalang pagalaktan ug mora kag usa ka buta nga wala makakita sa hitsura sa unahan nga imong gipadulngan.

Sa sayong pagbutho ni COVID-19 dinhi sa Pilipinas, diin wala pa mapopular ang iyang kamangtas, pipila sa mga doktor ang natakdan gumikan kay wala sultii sa tinuod bahin sa kinatibuk-ang gipamati sa pasyente.

Busa, imbes magiyahan unta ang doktor sa angay buhaton aron masalbar ang kinabuhi sa pasyente, sila na hinuong duha ang nangadisgrasya.

Ang dakbayan sa Sugbo naka-two hits na sa Enhanced Community Quarantine. Sanglit ang tinuod, gitabonan man sa bakak. Maayo gani kay gipadalhan ni Tatay Digong og mga sniper, espesyal grupo sa IATF nga gipangulohan ni DENR Secretary Cimatu ang atong dapit nga daw bangka nga gitimonan sa naratol nga timonil. Ug na-bull’s eye ang bakak nga gitagoan.

Kay kon wala pa masakpi? Aw, mosamot gyod unta ang pagka-makaluluoy nato, mga Sugboanon. Hala, sigeg panawagan, nga ipadaplin una ang pamolitika ug maghiusa sa pagpakiggubat sa COVID-19. Pero ang nagsulti, wala ba mamolitika?

Nganong dili man mogakos sa maong diyosnong hangyo ang tanang gihangyo, nga unta ang naghangyo mao man ang gipili sa mayoridad sa namili? Dili ba ang buotan, tibay ug disciplinarian nga amahan, kahadlokan man unta ug irespeto sa mga anak? Is there something wrong?

Dakong sala ang pagpamakak. Dili lang kini makadaot sa lawas. Makalaglag pa sa kalag. Ang sala maoy hinungdan sa naangkon tang mga sakit. Kay kon unsay gidili sa doktor nga dili nato kan-on ug imnon, gisupak.

Sama sa kuwarantinas nga gituyo pagpanday sa mga magbabalaod alang sa atong kaayohan. Apan padayong gisupak sa mga gahi. 

Ang dili pagsunod sa makaayo sa lawas ug kalag, dakong sala. Kay gumikan sa maong sala, daghang naangin. May nangataptan og COVID-19 ug nangamatay.

Ang pagpamakak ug ang pagkamasinupakon sa balaod, mga sala. Maoy nakaingon ning grabeng pandemiya karon nga giantos sa atong lawas ug kalag.

Matag tiktak sa mga gutlo o oras, may motaliwan. Walay nasayod kinsay sunod? Busa, tawo, pangandam. Balik sa Ginoo. Mas maayo mamatayng walay sala. Kay sa mamatayng daghag sala.

TINUOD
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with