EDITORYAL - Peligro sa ‘Pangyawat’
Kinaiya na sa mga Pilipino ang “pangyawat” o “mangyawat” kana bang daginoton ang usa ka sitwasyon bahala og unsa pay dangatan.
Sa ikaduhang adlaw sa pagpatuman sa general community quarantine ug pagtugot na sa pagbiyahe sa nagkadaiyang kalungsoran nga walay daghang kuti-kuti sa kadalanan midagsa ang mga tawo sa kadalanan.
Subo lang nga bisan tuod og nakabalo silang daan kung unsay mga protokol sa new normal, wala nila kini tumana. Nakita nga diha palang sa dapit diin sila magpaabot og masakyan nga bus nagpunsisok ug wala igsapayan kun nasunod ba nila ang social distancing.
Samtang diha sa mga terminals, pagbiya sa bus may social distancing pa. Apan paggawas sa bus ug pagabot sa unahan, namik-ap gihapon sila og mga pasahero ug ang resulta, nasakripisyo ang protokol ug gibutang sa drayber sa peligro ang panglawas sa mga unang mga nakasakay nga pasahero tungod sa pangyawat.
Ang pangutana karon, kinsa may angay basulon ani? Ang gobiyerno, ang mga drayber ug operator o ang mismong mga sumasakay? Kinsa kanilay nangyawat?
Ubos sa gipatumang kamandoan sa GCQ areas nagpabilin ang ang pagsuot og facemask ug social distancing nga kinahanglang sundon sa tanan.
Hain naman ang kapolisan, ang mga traffic enforcers, ang mga sundalo, ang mga barangay officials ug mga tanod ug uban pang tigbadlong aning mga malapason niadtong panahon sa ECQ?
Dili naman unta bag-o kining maong ‘new normal’ kay kapin duha ka bulan na kining gibuhat, nganong wa man mapadayon aning mga panahona?
Sa gibuhat sa mga buses nga ni-violate sa protocols, maglabad ang ulo sa mga otoridad pagkontrol kining pagkuyanap sa virus. Maglisud na paghimo ang contact tracing tungod sa kadaghan sa mga pasaherong nagpunsisok unya dili managkaila.
Ang gobiyerno nakakita na sa kalisdanan sa katawhan karon tungod sa kapin duha ka bulang enhanced community quarantine. Ang maong paghigpit nagbunga og maayo tungod kay kadugayan napahinay ang pagkuyanap sa virus. Apan tungod sa pangyawat mabutang nasab sa peligro ang publiko?
- Latest
