EDITORYAL - Modernisasyon sa transport sector

Mitiyabaw ang mga nagkadaiyang kahugpongan sa mga jeepney drivers ug operators sa mando sa LTFRB nga kadtong lang mga bag-ong mga pasaheroan maoy padaganon karong panahon sa general community quarantine.

Ang mga drayber ug operators nilusad og protesta apan dili parehas kaniadto nga sa karsada sila magmartsa, karon pinaagi sa online nga gipasiugdahan sa Pagkakaisa ng Samahan ng Tsuper at Operator Nationwide (PISTON) sa ilang gitawag nga Bumusina para sa Balik-Pasada.

Ang mga jeep pasaheroan gitugotan sa Land Transportation Franchise and Regulatory Board (LTFRB) Memo Circular 2020-017 nga makabiyahe ubosa GCQ apan kinahanglang molukat sila og Special Permits  aron pagsigurong limitado lang gihapon ang gidaghanon sa mga sakyanang magdagan sa kadalanan.

Kadto lang mga pasaheroan nga iya sa mga kooperatiba maoy padaganon,sagad niini nituman sa modernisasyon.

Samtang tuod walay koneksyon ang pagkakaraan ug kagangkagang nga mga jeepneys sa pagkatap sa novel coronavirus disease (COVID-19), nanagana nalang unta daan ang gobiyerno ug ang mga PUJ operators ug drivers nga sila makasakay sa new normal.

Nabantayan sab nga duna gyuy mga drayber nga wala molihok aron mahaom ilang pagpamasahero sa taliabot nga modernisasyon sa transport sector sa nasud.

Ang mga sumasakay nausab na sab ang gusto sa matang sa transportasyon human nakatilaw aning mga moderno ug mas haruhay nga mga pasaheroan sama sa e-buses ug buses.

Ang pandemic maoy nakapadali sa pagpahunong sa pagdagan aning mga kagang-kagang nga mga pasaheroan sa kadalanan karon.

Apan bisan wa pa ning COVID-19, ang direksyon sa pag-moderno sa transport sector sa Pilipinas wala mausab ug nagpadayon.

Moabot gyud ang panahon nga dili na gyud makadagan ang mga karaang mga pasaheroan. Kinahanglang mosunod ang uban ug mangita og paagi nga makasakay sa kabag-ohan.

Dili lang maghunahuna kanunay sa kaugalingong panginabuhian sanglit nagsalig sab sa mga pasaheroan ang mga sumasakay nga nanginabuhi sab sa ubang sektor.