EDITORYAL - K to 12 angay suportahan
(Banat) - October 22, 2019 - 12:00am

Dunay plano ang Ubos Balay Balauranan nga i-review kun epektibo ba gyud ang gipatumang K to 12 program sa Department of Education.

Apan kun ang tumong mao ang paghunong niini, di kini maayo kay sayo pa kaayo aron himuong rason ang mga makita unyang sayop tungod kay kun buot hunahunaon wala pay nakagradwar nga produkto sa K to 12.

Sa pagsugod palang sa K to 12 daghan ang nanaway kay wala sila magtan-aw sa benepisyong makuha sa mga estudyante gikan niini.

Una nilang nakita mao lang ang dugang nga duha ka tuig nga junior ug senior high school itandi sa kaniadto upat lang ka tuig nga high school.

Sa tibuok kalibotan, ang Pilipinas lamang ang uwahi na kaayong nipatuman niini, nakabentaha lang kay usa sa mga gitudlo sa basic education ang pinulongang English, apan dili sab kini magdugay kay niapas sab ang ubang mga nasud pagtuon og English.

Ang tumong unta sa K to 12 madugangan ang kamahoan sa mga estudyante pinaagi sa vocational ug technical skills diha sa junior ug senior high school.

Ang maong skills makatabang nga makasulod dayon og trabaho bisan og dili sila makapadayon sa kolehiyo. Pabor kaayo kini para sa mga kabus nga mga pamilya.

Pinaagi sab niini, mawagtang na kining pagtan-aw nga “high school graduate lang” ug sagad gamay ra gyud ang sweldong ihatag sa mga kompanya.

Dinhi sa Sugbo, ang Abellana National School sa Cebu City duna nay gi-offer nga mga technical ug vocational subjects sama sa entrepreneurial skills.

Busa kinahanglan kini padayunon ug angay buboan pa og dugang pundo aron madugangan pa ang angay makat-onan ubos sa K to 12.

Kun dunay kinahanglang buhaton sa K to 12 way lain kondili ang pagpalambo niini pinaagi sa paghatag og dakong pundo aron makompleto ang mga gikinahanglang mga gamit, classrooms, makinarya, computers ug mga instructors sa public schools.

Way laing opsyon ang DepEd kondili ang pagabante ra gyud ug dili paatras.

DEPARTMENT OF EDUCATION KTO12
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with