Bisikleta diha sa taytayan

Husto ang gihimo sa Metro Cebu Bridge Management Board nga bakwion ang unang disisyon niini nga idili ang bisikleta sa mga taytayan nga nagdugtong sa mga syudad sa Mandaue ug Lapu-Lapu.

Salamat nga sensitibo ang mga sakop sa MCBMB pinangulohan ni Gov. Gwen Garcia sa sentimento sa publiko.

Unang nahukman sa mga sakop sa bridge board nga idili ang bisikleta sa mga taytayan isip kabahin sa tinguha nga mapugngan ang mga kaso sa hikog ug maminusan ang kahuot sa trapiko.

Medyo daghan ang nangutana kun unsay relasyon sa pagpugong sa hikog ug sa paggamit og bisikleta diha sa taytayan. Luyo sa atong kasayuran, matud sa mga sakop sa MCBMB dunay dokumentado nga kaso sa hikog diha sa taytayan nga ang biktima nagsakay og bisikleta.

Ikaduha, ang bisikleta makabalda sa trapiko ug piligro nga mamahimong hinungdan sa aksidente.

Ang pagmaneho og bisikleta diha sa taytayan makapahinay sa dagan sa mga nagsunod nga sakyanan. Ug sa tinguha sa mga motorista nga madali siguradong mo overtake ni sa bisikleta nga maoy mamahimong hinungdan sa aksidente.

Gawas niini duna say balaud nga nagdili gyud sa mga non-motorized vehicle diha sa taytayan.

Ang maong balaud dugay na apan wala lang mapatuman. Sa laktud bisan wala pa ang resolution sa MCBMB gidili na ang bisikleta sa taytayan.

Apan bisan dunay balaud, dili makiangayon sa mga kabus ang istriktong pagpatuman niini.

Alang sa mga kabus nga gustong makadaginot sa plete, bisikleta maoy ilang sakyan paingon sa trabaho.

Kun nakabantay mo mas daghan ang magbisikleta paingon sa trabaho agi diha sa taytayan kay sa niadtong mga buot lang mag-exercise.

Pasagdi nalang nang gusto mag-exercise kay mamahimo man nila ning buhaton sa laing dapit.

Apan ang mga trabahante intawon nga way kapilian mag-unsa man? Mao nga salamat nga naminaw ang mga sakop sa NCBMB sa mga hunahuna sa publiko.