River cleanup

Nalipay kaayo ko kay makigtinabangay ang mga opisyal sa Mandaue City ngadto sa mga opisyal sa dakbayan sa Sugbo sa pagpanglimpyo sa Mahiga Creek karong sunod nga buwan.

Angay lang nga ang kagamhanan sa Mandaue ug Cebu City magtinabangay sa paglimpyo sa Mahiga Creek kay ang maong sapa anaa kini mahimutang sa utlanan sa duha ka siyudad.

Ang Mahiga Creek nagsukad kini sa ibabaw nga bahin sa Barangay Apas ug Banilad, unya molagbas sa Kasambagan, Subangdaku ug Mabolo.

Daghan kaayong hugaw ang sapa kay ang mga namuyo sa daplin niini, moderitso ra usab paglabay sa ilang mga basura sa sapa.

Si Mandaue City Administrator Jamaal James Calipayan miingon nga makigtinabangay sila sa mga opisyal sa Dakbayan sa Sugbo pagpahigayon og River Clean-up.

Matud ni Cebu City Mayor Edgar Labella nga nagkaestorya na diay sila niini ug si Mandaue City Mayor Jonas Cortes.

Unya gihangop sab kaayo ni Atty. Calipayan ang pagpahigayon og Traffic Summit sa tanang mga tagdumala og Local Government Unit (LGU) dinhi sa Metro Cebu alang sa epektibo nga kasulbaran sa problema sa traffic.

Ingon niana basta maayo og relasyon ang mga opisyal sa kagamhanan.

* * *

Pero nagpaabot gyud ko nga ang kagamhanan sa dakbayan sa Sugbo ubos ni Mayor Labella mopakita og political will ug panggub-on niini ang mga nakapagamay sa atong kasapaan.

Ang pagsulbad sa lunop-baha diha sa Barangay Parian mao ang pagpabalik sa gidak-on sa sapa nga gikan sa ubos nga bahin sa Barangay Day-as ug anaa miagi sa Sikatuna Street.

Anaa’y nagnegosyo og mga puthaw diha daplin sa karsada, grabe kaabusado. Usahay ang ilang mga puthaw, anha ibutang sa dapit nga para na sa aseras.

Ikaduha, ang ilang building gipalapad ug gipaabot nila paingon sa tunga na nga bahin sa sapa.

Klaro kaayo ang pag-encroach nila kay ang daplin sa taytayan, ang kinatung-an niini, gimarkahan og 1920, nga maoy tuig sa paghimo sa tulay.

Ang building niining mao nga nagnegosyo og mga puthaw diha sa Sikatuna Street, niabot na dapit sa tunga sa tulay.

Dili kay kini ra ang nakalapas sa balaod, daghan kaayo, ug angay nga si Mayor Labella mopakita og kaisog nga panggub-on kining nakalapas sa balaod.

Kon mahimo kini ni Mayor Labella, nga masulbad niya ang problema sa paglunop ug baha, unya mapahapsay ang trapiko, dayon masulbad ang problema kabahin sa basura, lisud na siyang pildehon kon mopapili siya pag-usab.

Apan unsaon man nga pwerteng bisiha ni Mayor Labella, ilabi na nga bisan bag-o pa siya nga mayor, midawat siya og mas lapad pa nga katungdanan isip chairman sa League of City Mayors.