Inato ang radyo ni Teban
Inato ang radyo sa Sugbo atol sa unang pagsulbong sa karera ni anhing Talisay City Councilor Julian Daan isip Esteban Escudero sa dramang Manok ni San Pedro dayong tapos sa dekada ‘70.
Kasagaran sa mga dramaturgo sama niya way kontrata nga gipirmahan. Gawasnon silang nagbalhin-balhin og mga sibyaanan.
Di talagsaon sa una nga ang kinaham nimong dramaturgo nagtingog pa sa usa ka sibyaanan sa Sabado apan magtingog na sa laing sibyaanan sa Lunes.
Bisan ang ilang talent fees kutob sulti ray gipasikaran, way nagtagad pagsuwat sa mga numero sa papel.
* * *
Nakasinati ko ini dihang nakaambit sa talagsaong popularidad sa panagpares nilang Teban ug Golyat pinaagi sa pagtampo sa ilang mugbo nga recorded nga mga pasiaw sa DYXL FM ug DYHP AM sa Radio Mindanao Network (RMN).
Way nidapit nako, wa koy gipananghiran, nisuway lang og makinilya og mugbo nga komedya sa pipila ka pahina nga one-fourth nga bond paper, gisud sa sobre nga gimarkahan og “Teban ug Golyat” ug gihatag sa guwardiya sa ground floor sa hotel sa downtown area nga maoy ilang nahimutangan sa sayong bahin sa dekada ‘80.
* * *
Human sa pila ka adlaw, nakabati ko sa radyo nga gi-record na nilang akong mga sinuwat.
Sa kataposan sa buwan, nibalik ko sa sibyaanan, gitultolan ko sa guwardiya sa ilang cashier ug gihatagan ko sa bayad—tag P10 matag pasiaw.
Nibalik ko pagka sunod adlaw bitbit ang mas daghang pasiaw.
Sa kataposan sa buwan gihatagan ko nila og mas dakong bayad. Nga dako og tabang sa mga gastohan sa eskuylahan ug pinuy-anan.
* * *
Wa mi magkakita ni magkasulti. Apan akong nahibaw-an nga si Teban ang nitugon sa ilang buhatan nga hatagan ko sa tukmang bayad.
Dihang nagkita mi—reporter ko ug politiko na siya—wa siya moangkon og kredito sa pagtabang sa akong pagsugod sa radyo.
Mahimo ra gyod unta niyang laktawan ang akong tampo ug gipalabi ang mas daghan pa nga mas maayong pagkasuwat nga mga pasiaw nga ilang ma-record.
Ang iyang paghatag nako sa kahigayonan, bisan wa siyang kaila, nakapugas sa pagsalig sa akong kaugalingon nga maoy mabasol sa akong pagpangahas sa pagsud sa industriya. Bisan kon di na sama ka-inato sa iyang panahon.
* * *
- Latest
