Ang Ed Labella kong nakita
JAV BANATI - Javier Yntig Tapulado (Banat) - August 12, 2019 - 12:00am

Naghinangat sab kadtong local election. Paris silang Michael ‘Mike’ Rama niadtong higayona, kinsa milansar pagkamayor dinhi sa siyudad sa Sugbo, samtang si Edgar Labella maoy iyang bise.

Ang among pobreng pundok sa mga Cebuano writers, Dagang Foundation Incorporated (DFI) ubos sa chairmanship ni Atty. Cesar P. Kilaton ug pinangulohan ni anhing Noy Ernesto ‘Erning’ A. Amatiaga, miimbitar nilang Rama ug Labella aron maoy mopapanumpa sa among bag-ong napiling opisyales, diin didto himoa sa Pete’s Kitchenette.

Ug sama sa mga buotang higala, luyo sa ka habog sa ilang nahimutangan, sila nanaog gayod ug miipon namong mga timawang magsusulat.

Ang ilang presensiya, ang ilang pagpakigpulong ug ang ilang pagpahurar sa mga bag-ong napiling  DFI officers, nakapabukad sa tagsatagsa namo ka kasingkasing, diin  nag-awas-awas ang gibati namong kalipay – nga hangtod karon nagpabilin pang buhi sa akongp anumdoman.

Niadtong yugtoa, nahanggap ko ang amyon sa tinuorayng pagkatawo ni Ed. Ilabina kay sa iyang pagpamulong, gihisgotan ang makalilisang kasinatian nga pagkalunod sa barkong iyang gisakyan, diin ang gihimo niyang gabayan sa pag-utaw-utaw sa kadagatan mao ra gyod ang pagpangadye ug pagtugyan sa iyang pagsalig ngadto sa Kahitas-an.

Didto akong nasayran, ang karelihiyoso niya. Dili lang sa pulong. Kondili, hasta sabuhat! Kay dihang nagkahagkanay among palad, nahinol ko ang ebidensiya sa iyang ka kugihan. Si Ed misulti nga hilig siyag pananom.

Gani, duawon man gyod niya ilang umahan aron masusi-lantaw ilang kamanggahan.

Dili lang sa pagpananom kugihan si Ed. Usab, sa iyang pagka-public servant.

Suod kong higala, silingan nilang Ed sa usa ka subdibisyon sa Talamban, mitug-an nako, nga kaadlawon pa kuno mogikan na si Labella paingon sa trabaho. Unya, lawom nang gabii mouli gikang nangalagad sa katawhan.

Ang nakanindot ni Ed kay wala gyod maduhigig buling iyang pagpanerbisyo.

Tingale, usa ni sa rason nganong siyay midaog sa pagkamayor sa imaging piniliay.

Mipadayag si Ed nga patas ang iyang pagtratar sa tanan niyang konsehal, pro man o oposisyon.

Kini tungod kay ang iyang pagpangalagad nagpunting man gyod alang sa kaayohan sa katawhan. Pagkanindot nga panan-aw!

Na hala, Mayor Ed, banati ang pagmatuod nga wala masayop ang kinabag-ang siyudadnon sa ilang pagpili nimo!

ED LABELLA
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with