Pagsugod nga husto

Nagkauyon ang bag-ong mga napili nga mga opisyal sa Kapitolyo ug Dakbayan sa Sugbo nga magtigom aron hisgutan ang mga maayong buhaton aron pagsulbad sa mga nag-unang problema sama sa trapiko, baha, ug basura.

Sila si governor-elect Gwen Garcia ug mayor-elect Edgar Labella nagtagbo kagahapon ug naghisgot unsaon nga ang dakbayan ug lalawigan makakab-ot og hiniusang solusyon sa mga nahisgutang suliran.

Dalaygon ang maong lakang tungod kay gikinahanglan ang panaghiusa sa tanang mga opisyal sa Sugbo pagsulbad niining maong mga problema.

Dili mahatagan og epektibo nga solusyon ang problema sa trapiko, baha ug basura kon mag-iya iya ang mga opisyal.

Sa tinud-anay lang kaniadto pa unta ni angayang gibuhat sa atong mga opisyal. Apan ang problema kay dili sila magkasinabot.

Usa sa mga hinungdan mao ang politika ug garbo sa mga opisyal ingon man usab ang katapulan ug kakuwang og plano.

Pananglitan si outgoing Mayor Tomas Osmeña dili gusto moapil sa panaghugpong sa mga mayor sa Metro Cebu aron matubag ang maong mga problema.

Rason ni Osmeña mao nga makahimo ang dakbayan sa Sugbo pagsulbad sa kaugalingon niining mga problema.

Apan dili masulbad ang problema og dili sila maghiusa sa paghimo og solusyon.

Pananglitan ang trapiko, bisan pa og mapahapsay sa dakbayan sa Sugbo ang dagan sa mga sakyanan sulod sa iyang teritoryo mosuyla gihapon ang problema kun mobara ang dagan sa trapiko sa kasikbit niini nga mga siyudad.

Ingon sab niini ang sitwasyon sa baha. Mao nga di gyud mahimo nga mag-iyahay ang mga opisyal.

Salamat nga bisan wala pa magsugod ang ilang mga termino apan duna nay mga plano sila si Garcia ug Labella.

Mao ni ang tukma ug angayang buhaton ang magsugod sa husto ug alang nako ang pagpakig-alayon sa usa’g usa maoy hustong buhaton sa mga opisyal sa gobiyerno.

Kun gisugdan pa unta ni kaniadto hayan dako na unta og agi. Hayan dili unta ingon niini ka grabi ang problema sa trapiko, baha ug basura nga atong nasinati dinhi sa Sugbo.