Salamat sa teknolohiya
LINGTUNGANAY - Fred Languido (Banat) - April 25, 2019 - 12:00am

Saludo ko sa epektibo nga pamaagi sa Department of Foreign Affairs pag-process sa mga application sa passport. Dako na kaayo og kalainan ang ilang sistema sa pagkakaron. Mas sayon alang sa mga aplikante ug malikayan ang paghuot sa ilang buhatan.

Kun kaniadto imong makit-an ang gatosan ka mga aplikante nga maglinya gawas sa buhatan sa DFA, ang uban anha nalang gani matulog aron masiguro nga makauna sa linya, karon dili na nimo kini makit-an  diha sa maong ahensiya.

Dako og natabang ang teknolohiya aron mapahapsay ang paagi ug aron malikayan ang pagdagsa sa mga fixers nga maoy usa sa mga hinungdan sa korapsiyon.

Simple lang  kaayo ang ilang pamaagi. Inay nga moadto ka sa buhatan sa DFA aron mokuha og priority number ug maglinya, ang imong buhaton log-in sa ilang website og pili og adlaw ug petsa ingon man oras kanus-a ka moadto sa ilang buhatan. Tudlo-an ka diha sa ilang website unsay mga dokumento nga imong andamon ug sa mga paagi nga imong sundon inig-abot nimo sa ilang buhatan. Kun imo lang subayon ang pamaagi ug andamon ang tanang dokumento nga gikinahanglan, way rason nga ikaw malangan.

Pananglitan, nikuha ko og appointment sa DFA niadtong miagi semana alang sa renewal sa akong passport. Gahapon sa buntag maoy akong schedule. Basi sa akong schedule kinahanglan ko nga tua na sa buhatan sa DFA alas 10 hangtud sa alas 11. Giandam nako ang tanang requirements lakip na ang resibo sa akong gibayran  pinaagi gihapon sa online.

Tuod man untop alas 10 gipasulod ko sa gwardiya ug ang ubang mga sama nako og schedule. Didto sulod sa DFA maglingkod ka nga hamugaway ug bugnaw samtang magpaabot sa imong turno nga susihon ang mga requirements.

Human masusi kumpleto ba ang imong requirements, tudloan ka paingon sa encoding ug data capturing. Wala pay alas 11 nakumpleto na ang akong renewal ug naghuwat nalang nga ma-release ang akong bag-ong passport usa ka semana sukad sa akong pag-apply.

Susama sab niini ang proseso nga gisunod sa Philippine Statistics Authority sa pagpangisyo og birth certificates, certificate of no marriage, marriage certificate, ug uban pa. Kun nahimo ni sa DFA ug sa PSA, way rason nganong dili ni mahimo sa ubang ahensiya sa gobyerno nga hangtud karon nagkamuritsing gihapon ang ilang sistema.

Daghang salamat sa teknolohiya nasulbad ug napahapsay ang kaniadto nagkayamukat nga paagi diha sa DFA ug PSA.

TEKNOLOHIYA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with