Adik nga sikat

Gibutyag ni Philippine Drug Enforcement Agency (PDEA7) Director General Aaron Aquino nga moabot na ngadto sa 31 ka mga artista ang nalambigit sa gidili nga drugas.

Tungod niini, nagkadaghan ang nanawagan kang Aquino sa pagpagawas sa mga pangalan sa mga sikat o artista nga nalambigit sa gidili nga drugas.

Apan dili uyon si Presidente Rodrigo Roa Duterte sa pagpagawas sa mga anaa sa lista sa mga nalambigit sa gidili nga drugas.

Si Duterte misupak tungod sa rason nga dili mga kandidato sa nagsingabot nga eleksiyon ang mga sikat o artista. Matud pa sa Presidente nga mas maayong paaboton na lang ang panahon nga mabutyag ang pangalan niining mga sikat o artista.

May punto si Duterte sa iyang argumento, apan ang dili pagpagawas sa mga pangalan, makamugna og dili makiangayon nga pagtoo sa mga tawo. Ang mga tawo o ang publiko magtoong ang tanang mga sikat o artista nalambigit sa gidili nga drugas.

Kun ako lang, mas maayong ipagawas ang mga pangalan sa mga sikat o artista nga nalambigit sa gidili nga drugas aron dili sila makapanakod ngadto sa uban.

Dili nato kalimtan nga impluwensiyado ang mga sikat o artista. Gani tungod sa ilang impluwensya, sila ang gipa-endorso og mga produkto. Gani ang uban kanila napili pang opisyal sa gobiyerno.

 Si Erap nahimo nga Presidente sa Pilipinas. Si Vicente Sotto III nahimong Presidente sa Senado.

Si Lito Lapid nahimong  gobernador ug duha ka higayon nga nahimo nga Senador.

Si Bong Revilla ug Jinggoy Estrada nahimong mga Senador. Si Vilma Santos nahimong Gobernador ug Kongresista. Si Richard Gomez nahimong Mayor karon sa Ormoc City.

Pipila lang ni sila sa mga sikat o artista nga nakahupot og tag-as nga katungdanan sa gobiyerno tungod sa ilang impluwensya.

Ang mga millenials nga mahilig mosunod sa unsa may gihimo sa mga artista kinahanglan nga magiyahan ug ilikay sa pagsunod ug paghimong idolo sa mga sikat o artista nga nalambigit sa gidili nga drugas.