Gamay na lang ang mga adik

Sa survey sa Social Weather Station (SWS) nga gihimo niini kaniadtong buwan sa Disyembre sa miaging tuig, 66 porsiyento sa 1,440 ka tawo nga gipangutana niini ang nagtuo nga miubos na ang gidaghanon sa mga adik sa ilang dapit. Moabot sa 14 porsiyento ang nagtuo nga misaka ang gidaghanon sa mga adik ug siyete porsiyento ang nagtoo nga wala matandog ang gidaghanon sa mga adik sa ilang dapit.

Tungod sa resulta sa survey, ang Malakanyang mibandilyo ug nangangkon sa bunga sa kampanya sa administrasyong Duterte sa iyang kampanya batok sa gidili nga drugas.

Apan ang survey sa SWS wala magsulti kun unsa ang nakapakunhod sa gidaghanon sa mga adik. Mikunhod ba ang gidaghanon sa mga adik tungod kay mibiya na ang mga adik sa ilang bisyo ug nag-usab na sa ilang kinabuhi o mikunhod ang gidaghanon sa mga adik tungod kay gipatay sila sa mga polis.

Sigun sa datus sa Philippine National Police moabot sa 4,999 ka mga drug personalities ang ilang napatay sa ilang mga lihitimo nga operasyon.

Apan dili motuo niining maong gidaghanon ang Human Right Groups. Para ning maong grupo katulo gipilo ang gidaghanon sa mga napatay nga drug personalities tungod kay ang maong gidaghanon wala maglakip sa mga gipatay nga drug personalities nga wala angkona sa mga polis.

Kun ikaw ang akong pangutan-on, unsay imong gituhoan nga nakapakunhod sa gidaghanon sa mga adik o drug personalities, ang hugot nga kampanya sa gobyerno ni Presidente Duterte nga nakapadesider sa mga adik sa pagbiya sa ilang pagkaadik o ang pagpatay sa mga adik?

Aduna pa koy laing pangutana ug mga kalibog sa resulta sa survey sa SWS. Unsaon man pagtakdo sa resulta sa survey nga miubos na ang gidaghanon sa mga adik ug sa nagbaha nga gidili nga drugas sa kadalanan?