EDITORYAL - Chinese workers sa nasud

Daghang mga Pilipino ang walay trabaho tungod sa daghang rason, kuwang sa kinaadman, tapolan o wala lang gyuy trabaho silang masudlan bisan sa mga pabrika o construction sites.

Apan unsaon man kun ang usa sa hinungdan nganong daghang mga Pilipino ang wala nakatrabaho mao nga wala na gyuy bakante para kanila kay daghan nang mga langyaw nga nanarbaho dinhi?

Base sa mga nanggawas nga balita, kaliboan na nga mga Chinese nationals ang nia karon sa Pilipinas. Daghan ang nangasakpang ilegal nga nanarbaho dinhi kay wala silay permiso gikan sa Department of Labor and Employment (DOLE).

Bisan sa dalan Colon sa Cebu City, daghang mga tindahan diha karon nga gipanag-iya og mga Chinese businessmen nga nagkuha og mga Chinese nga kahera.

Pipila ka tuig na ang nakalabay dihang adunay dul-an 50 ka mga Chinese nationals nga nasaag diha sa Cebu South Bus Terminal nga nagsuot pa og coverall uniforms ang nagpatabang sa mga otoridad human sila giabandonar sa ilang employers nga Chinese.

Giingong nagtrabaho sila sa usa ka kompanya nga gikuha ang serbisyo sa gobiyerno pagtaod sa mga linya sa kuryente kaniadto. Way bisan usa kanila ang makamao bisan usa ka pulong sa Englis dihang nakahinabi sa Banat News. Didto sa Luzon sa nakalabay nga mga semana daghang mga Chinese nationals ang nangasakpang nanarbaho sa construction projects didto ug nahibaw-an nga wala silay mga alien work permits.

Ang kaniadto mga trabaho sama sa kahera, tindera, warehouse man, karpentero, mason, electrician ug uban pang laborer jobs nga mahimong kasudlan unta sa mga Pilipinong ubos ra og kinaadman giokupar na sa mga Chinese. Kun kaniadto, ang mga Chinese gikan sa China kun manganhi sa Pilipinas isip mga turista ug nagdala og dolyares nga makatabang sa ekonomiya sa Pilipinas, apan karon, nahimo na silang kakompetensya ug nakapadugang sa unemployment sa mga Pilipino.

Unsa kahay gibuhat karon sa gobiyerno bahin niini?