Kahingawa sa mga rice retailers

Ang mga namaligya’g bugas dinhi sa Central Visayas mipadayag sa ilang kahingawa ug kaguol nga maalkansi sila sa higayon nga ipatuman na ang suggested retail price (SRP) sa bugas dinhi sa atong region.

Ingon man, ilang gikabalak-an nga lagmit maglibog ang mga pumapalit sa higayon nga dili na ipagamit ang mga brand names sa bugas sama sa naandan nga Ganador, Lion Ivory, Sinandomeng, Conchita, Super Angelica, ug uban pa 

Gumikan sa maong kalibog, dili na lang hinoon kuno mopalit o gamay na lang ang paliton, kay dili man maklaro kon asa ang regular milled, well milled, premium, ug special rice. Ug ang imported nga bugas nganlan na sa origin niini, say, Vietnam rice, Thailand rice, o Pakistan rice.

So, ini’g palit nimo’g bugas, kinahanglan masayod ka unsay mga lami sa regular ug well milled nga bugas, ug unsay kalainan sa lami sa premium rice.

Kun tumanon ang SRP, barato na gyud kaayo ang bugas: Regular milled rice, P39 per kilo; local well milled, P44 per kilo; ug ang local premium grade rice: P47 per kilo.

Sa ato pa, ang Ganador nga karon kapin sa P54 ang kilo, kon isipon nga well milled tag P44 na lang ang kilo, ug kun mabutang sa local premium grade tag P47 na lang ang kilo?

So, barato na gyud kaayo. Apan, sa mga retailers, mous-os ba usab ang ilang kompra gikan sa mga supplier niini? Ug kabahin sa mga mag-uuma, ila ba usab i-roll back ang presyo sa ilang pagbaligya? Ug mga middlemen, ang mga komprador, ug ang mga millers, mo-adjust kaha sila sa mga presyo?

* * *

It seems nga ang Dakbayan sa Mandaue natakdan sa kaguliyang sa politika sa Dakbayan sa Sugbo diin, ang ilang konseho, sama sa Cebu City, dili na pud magkasabot.

Kini, gumikan lang gyud sa politika. Sama sa Dakbayan sa Sugbo, mao na unyay mopatigbabaw ang mga paglalis ug mga pagsupak sa isi’g ka sakop sa Konseho, at the expense sa katawhan nga maoy nagbutang nila diha sa Konseho.

Mao ni ang nakangil-ad sa matang sa politika sa atong nasud, labi na nga nagsingabot ang eleksyon, mapadaplin gayud ang interes sa katawhan over sa mga vested ug personal interests sa mga piniling opisyal sa kagamhanan.

Simple ra gayud kaayo ang definition sa Webster Dictionary sa pulong politics: the science and art of government. Ambot ngano nga giusab man sa atong mga politiko ang kahulogan niini?