Davide batok Garcia

Karon maoy unang adlaw sa pagpanawat sa Commission on Elections sa mga certificate of candidacy alang niadtong buot mopapili sa eleksiyon sunod tuig. Base sa kalendaryo sa Comelec, ang ilang pagpanawat sa COC matapos karong petsa 17.

Sayo ang pagpasaka sa COC tungod kay kinahanglan sa Comelec nga isuwat daan ang mga pangalan sa kandidato diha sa official ballot alang sa automated counting. Gitugot hinoon sa Comelec ang substitution alang niadtong buot mohulip sa kandidato nga mosibog hangtud karong Nobiyembre 29.

Sa Lalawigan sa Sugbo nakumbinsir na ni Gobernador Hilario Davide III si Bise Gobernador Agnes Magpale nga sila gihapon maoy magpares alang sa pagpasubli sa katapusang termino. Unang nibalibad si Magpale tungod kay gusto na kuno siyang moretiro sa politika.

Lahi hinuon ang kasayuran nga akong nadawat kini tungod kay mas interesado kuno si Magpale nga magpapili pagka-gobernador. Matud sa tinubdan nga kun mahinayon ang plano, ikapares ni Magpale si Kongresista Wilfredo Caminero sa second district. Samtang si Davide giingon nga maoy ilang himoon nga kandidato sa pagkakongresista hulip ni Caminero.

Hinoon gihimakak ni Davide ang maong kasayuran ug giinsister nga mopapili siya pagbalik isip gobernador.

Kun way kausaban, ikasangka niya ang kanhi gobernador nga karon kongresista sa third district nga si Gwen Garcia. Wa pay klaro kinsay iyang ikapares human mobalibad si Kongresista Benhur Salimbangon sa fourth district.

Dunay mga sugyot nga ang iyang umagad nga si Cebu Port Authority Commissioner Duke Frasco maoy himoong runningmate. Samtang kwalipikado ug way duda sa katakus ni Frasco nga mangulo sa Provincial Board, apan dili maayo nga gikan sa usa ka pamilya ang magpares.

Nagtuo hinoon ko nga dili sab mosugot ang kanhi gobernador niini. Lig-on si Gwen tungod kay sulod sa siyam ka tuig niya nga pagdumala sa Kapitolyo natagamtaman sa lalawigan ang di hilabwan nga paglambo. Sigurado ko nga nituhop sa mga kabus nga Sugboanon ang kaayuhan nga nabuhat sa iyang administrasyon kaniadto labaw kay sa mga pasangil sa kahiwian batok niya.

Gikinahanglan hinoon ni Gwen ang lig-on nga bise gobernador nga ikatimbang sa kampanya.