Si Mocha, Senado ug Pederalismo

Gilabhan pagmaayo sa mga Senador si Assistant Communication Secretary Esther Margaux “Mocha” Uson tungod sa law-ay nga pederalismo nga video nga nag-viral sa social media.

Ang video nagpakita sa social media blogger ug co-host ni Uson nga si Drew Olivar nga naghimo sa ilang gitawag nga Pepe-dede-ralism nga sayaw.

Si Uson ug Olivar mihulagway sa ilang gihimo nga maghatag og kasayoran kalabot sa pederalismo. Sa maong video si Drew Olivar nag-cheer samtang nagsayaw ug naglitok niining maong mga pulong: Ipepe, ipepe, Idede, idede. Ipede,pede,pede, pederalismo.

Ang mga pulong nga gilitok ni Drew gilain sa pagsabot sa mga nakadungog ug nakakita sa video nga gi-post sa Mocha Uson blog. Ang “pepe” man gud termino kini nga nagpasabot sa kinatawo sa babaye samtang ang “dede” nagpasabot usab kini og tutoy sa babaye.

Tungod niini nangutana si Senador Hontiveros kang Mocha kon unsay relasyon sa pederalismo sa kinatawo ug tutoy sa babaye. Si Hontiveros nagkanayon nga mas maayong ipasabot unsa ang pederalismo dili pinaagi sa pag-sexualize niini.

Si Senador Bam Aquino mihulagway sa video nga dili haum sa gikampanya nga pederalismo samtang ang Presidente sa Senado nga si Vicente Sotto III mihulagway sa video nga dili maayo nga komedya. Giawhag usab ni Senador Koko Pimentel si Mocha Uson sa pagbiya lamang una sa iyang trabaho isip Assistant Communication Secretary.

Si Uson gisangonan sa kagamhanan ni Presidente Rodrigo Duterte sa pagtabang sa pagpasabot sa pederalismo nga giduso sa iyang gobiyerno pero wala masabti, wala masayri ug wala mauyoni sa katawhan sigun sa resulta sa survey nga gihimo sa Pulse Asia.

Tungod sa ka-seryoso ni Presidente Duterte sa pagduso sa pederalismo, ang iyang kagamhanan migahin og 90 milyones ka pesos alang niini.

Sugyot nako sa gobiyernong Duterte, maoy kuhaa ninyo nga molangkob sa inyong speakers bureau ang mga anaa sa akademiya ug kadtong aduna nay lawom nga pagsabot sa pederalismo