Idolo sa pamentaha

Human nakapasaka sa iyang certificate of candidacy (CoC) pagka mayor sa lungsod sa Sta. Monica sa Isla sa Siargao sa Surigao del Norte, nisakay dayon si Rosalinda Penera sa sadya nga motorkada uban sa iyang mga kandidato pagka konsehal pagpahibawo sa mga botante sa ilang pagdagan.

Apan may gamay siyang sipyat. Nagmotorkada sila sa Marso 29, 2007, ang katapusang adlaw sa pagpasaka sa mga CoC. Wa pa’y campaign period nga gitakda sa Commission on Elections (Comelec) nga magsugod sa Marso 30, 2007. Mao nga bisan nidaog sa piniliay ug nakalingkod na sa munisipyo, gipalagpot siya sa Comelec tungod sa premature campaigning.

* * *

Nauwaw si Penera apan gikuwestiyon niya ang legalidad sa sukaranan sa Comelec ubos ni kanhi Chairman Benjamin Abalos sa pagtaktak niya:

Ang Section 80 sa Omnibus Election Code nga nagkanayon, “It shall be unlawful for any person, whether or not a voter or candidate…to engage in an election campaign or partisan political activity, except during the campaign period.”

Human sa duha ka tuig, gipaboran sa Korte Suprema si Penera sa desisyon nga sinuwat ni Associate Justice Antonio Carpio. Maong sukad sa 2009, dili na makasilot ang Comelec sa premature campaigning. Dili mabasol ang mapahimuslanong mga politiko nga bilib kaayong Penera.

* * *

Dihang nibanos sa Comelec si kanhi Chairman Andres Bautista niadtong 2015, giawhag niya ang Kongreso sa pagpasar og balaudnon nga mohimong krimen sa premature campaigning. Apan wa’y senador ni kongresista nga naminaw niya.

Ambot, linga ba lang sa mas dinalian nga mga balaudnon, O wa sila’y kalainan ni Penera nga ganahang mamentaha sa pagpangampanya bisan wa pa’y campaign period.

* * *

Paglabay sa 11 ka tuig sukad sa makauuwaw nga kalapasan ni Penera sa mga lagda sa piniliay, nagpabilin ang nangalisbo nga eskandalo:

Mapatuman lang ang mga lagda sa Comelec atol sa campaign period; apan makahimo ang mga politiko bisan unsa’y ilang gusto, apil na ang paglapas sa gasto ug gidak-on sa campaign materials, sa wa pa’y campaign period.

Katapusan namong susi, si Penera gihapon ang mayor sa Sta. Monica, apan bag-o lang siyang gipasakaan og kasong pagpangawkaw ni Ombudsman Conchita Carpio-Morales.

Kay wa pa diay maleksiyon: Nipalit og luna nga balor og P980,000 nga wa’y pananghid sa Sangguniang Bayan.

* * *

([email protected])