Buyer dili makabuot sa portion nga paliton sa usa ka undivided property

Dear Atty. Divine,

Duna mi na-inherit nga property gikan sa among amahan. Titulado kini ug duha ra mi ka igsuon ang magbahin. Apan wa pa namo ma-process ang transfer ngadto sa among ngalan kay wa mi budget para sa estate tax. Ang akong igsuon nagtinguha sa pagbaligya sa iyang share ug gani naa na siya’y buyer. Apan ang problema kay ang iyang buyer namili sa portion nga gusto niyang paliton, kay kadto gyud nga daplin sa dalan.

Misupak ko niini kay mahulog nga interior ang akong share nga mahibilin. Ang akong pangutana kon makabaligya ba ang akong igsuon sa portion nga gusto sa iyang buyer bisan kon misupak ko niini? Daghang salamat. — Fred

Dear Fred,

Isip mga co-owner sa property nga kabilin sa inyong amahan, kamong duha adunay patas nga katungod sa property ug tungod kay wa pa kini ninyo mabahin, so ang imong igsuon dili makabaligya og specific portion sa property gawas lang kon mouyon ka niini ug modesisyon mo nga i-subdivide ang property.

Ang iyang buyer mahimong mopalit sa share sa imong igsuon o sa iyang successional rights, apan dili siya makabuot kon asa nga portion. Ang maayo ninyo nga buhaton aron pag-settle sa issue mao ang pagpa-survey sa property ug inyo kining ipatunga aron maklaro na ang inyong share ug siya makabaligya na sa iyang specific share, samtang ikaw mahimo nga maka-develop sa imong bahin. Thanks and God bless.  — Atty. Divine

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.