Gawasnon na ang Marawi

Gipahibalo kini ni Presidente Rodrigo Duterte usa ka adlaw human napatay sa mga sundawo ang mga pangulo sa teroristang grupo nga gitawag og Maute-ISIS nga sila si Isnilon Japilon, ang giila nga Emir sa grupo nga ISIS sa Southeast Asia, ug Omar Maute, ang nahibiling pangulo sa Maute brothers terrorist group.

Human sa kagawasan sa Marawi City, mao na sa’y atubangon sa gobiyerno ang pagpabarug sa nalusno, nagusbat nga siyudad. Si Secretary Delfin Lorenzana nagkanayon nga ang gobiyerno nagkinahanglan ug P150 bilyones aron gastoon sa pagpabarug pagbalik sa siyudad. Asa kaha ni kuhaa sa gobiyerno ang maong kantidad?

* * *

Gisaway ni Tomas Osmeña ang oposisyon tungod sa pagsupak niini sa iyang paggahin ug dakong kantidad para sa paghakot sa basura kay sa pagsulbad sa suliran sa baha, apan gisumbalik usab siya pagsaway ni Konsehal Joel Garganera.

Si kanhi mayor Mike Rama nigasto ra kaniadto og mga P180 milyones sa pagpahakot sa basura. Apan karon, ang kantidad gipilo sa makadaghan ni Mayor Osmeña ang maong gasto.

Ang siyudad migasto na og kapin sa P300 milyones sa paghakot sa basura sa dakbayan. Sa panahon ni Rama pwerte ang pagpanaway ni Osmeña sa gigasto paghakot sa basura, apan karon sa iyang administrasyon dako kaayo ang iyang gigahin niini.

Si Mayor Osmeña ug si Konsehal Garganera pulos adunay punto sa ilang mga baruganan. Husto si Osmeña kay ang basura, ting-init man ug tinguwan, manimaho g’yud, pero ang baha naa lang kon mag-uwan.

Husto pud si Garganera kay tinuod man nga gisaway pag-ayo ni Osmeña si Rama sa iyang paggahin og dakong pundo para sa basura kaniadto, unya karon siya na pud ang migahin og dakong pundo nga gipilo-pilo pa sa makadaghan.