BFP alerto kanunay

Nangandam na usab karon ang kabomberohan sa 51st International Eucharistic Congress (IEC) nga pormal na nga buksan ugmang adlawa dinhi sa dakbayan sa Sugbo. Nasusi na sa mga fire inspectors ang mga venue diin maoy tapokanan sa mga mosalmot sa maong relihiyosong kalihokan. Manghinaut kita nga walay mga kakulian nga mahitabo ug magmalampuson unta kini.

Sa makausa pa gihangyo ang publiko nga magpabiling magmabinantayon aron makalikay kita sa sunog. Apil nga mabasol ang mga lumolupyo kun ang mga bombero dugay’ng makapawong sa sunog nga moulbo sa ilang mga dapit.

Kini tungod kay hapit tanan sa mga tawo nga nagpuyo sa thickly-populated areas, subra kahakog og mga lugar nga bisan ang mga agianan na unta sa mga tawo, sakopon nila sa ilang panimalay.

Resulta, kun may sunog nga moulbo, maglisud na ang mga bombero sa pagsulod, sama niadtong nahitabo sa Sitio Avocado sa Barangay Lahug ug kadtong sa Barangay Luz nga wala makasulod dayon ang bombero.

Kini usab maoy nahitabo sa sunog nga miulbo sa miaging tuig didto sa Sitio Bato, Barangay Ermita nga wala makasulod ang mga bombero kay ang access road adunay tapangko sa usa ka panimalay.

Angay gyud unta nga ang mga opisyal sa kabarangayan motan-aw niining sayop ug abuso sa ilang mga lumolupyo aron nga dili kini makahatag og problema sa mga bombero kun may sunog nga moulbo.

* * *

Kay ang mga lumolupyo aduna may tagsa-tagsa ka kahugpongan, angay gayud usab unta sila nga magmugna og Fire Brigades diha sa ilang lugar.

Kini aron nga kun adunay sunog dili na sila dayon matarantar ug masayod na sila unsay angayan nga buhaton. Unya, magpundo sila kanunay og tubig nga magamit dayon sa pagpawong sa kayo.

Ang labing nindot gyud kun adunay moulbo nga sunog, magtinabangay dayon sa pagpawong sa kayo, dili kay mag-iyahay na lang sa pagpanghipos sa ilang mga butang. Kinahanglan nga ang mga tawo magbaton gayud og numero sa atong kabomberohan. Kun aduna mo’y PLDT, mahimo sila nga makontak sa 160.

Apan ang atong communications center sa kabomberohan dinhi sa dakbayan sa Sugbo makontak usab sa 256-0541 ug 256-0542. Sila na ang mopahibalo sa ubang fire stations.