First communicants
First communicants
Vilma Andales (Banat) - November 11, 2015 - 9:00am

Usa sa mga highlight sa International Eucharistic Congress, Enero sunod tuig mao ang pagpakalawat sa mga first communicant nga mag-edad sais hangtod siete anyos.

Sa panahon ni Pope St. Pius X nga iyang gipaubos ngadto sa sais-siete anyos ang edad sa makahimo na sa pagkumpisal ug pagkalawat. Sa maong pangidaron aduna nay kabuot ang usa ka bata. Nga sa maong edad makaamgo na ang usa ka bata sa maayo ug dili maayo nga mga butang, kalihukan o panghuna-huna nga iyang buhaton.

Mahimong dili pa hingpit nga masabtan sa usa ka bata sa maong pangidaron ang kahulogan, importansya o epekto sa iyang gihimo, gihuna-huna o gipamulong apan anaa na kaniya ang pagka-amgo nga ang maong binuhatan o sinultian dili makaayo.

Ang 51st IEC sunod tuig nga ipahigayon dinhi sa Sugbo maoy ikaduhang higayon nga host country ang Pilipinas.

Ang labing unang higayon nga nahimong host country ang Pilipinas sa International Eucharistic Congress nahitabo niadtong 1937 didto sa kaulohan atol sa 33rd IEC.

Sa maong okasyon nahatagan sa kahigayonan ang liboan ka mga bata tibuok nasud nga makasalmot sa Kristohanong kalihukan pinaagi sa pagpangalawat.

Usa sa mga nakasalmot sa 33rd IEC mao si Cebu Archbishop Emiritus Ricardo Cardinal Vidal.  Matud ni Cardinal Vidal siya ang napili nga representante sa Marinduque  sa mga first communicant alang sa 33rd IEC didto  sa kaulohan.

Ang dili malimtan nga kasinatian ni Cardinal Vidal sa akong pagpakighinabi kaniya mao ang tumang kadasig nga makaadto siya sa Manila sa labing unang higayon. Sa iyang pag-abot dako iyang katingala nga pulos sementado ang karsada. Gani nagtuo siya nga pulos mga datu ang taga Manila tungod kay sementado  ilang mga dalan, lahi sa probinsya nga ang mga datu ray makapa-semento sa ilang mga aseras.

Dili usab malimtan sa Cardinal ug hangtod karon sa edad nga 84 anyos iya pang nasag-ulo ang mga kanta sa ilang first communion. Kini tungod kay kada adlaw sulod sa pipila ka buwan sa wala pa ang 33rd IEC bansayon siya sa ilang katekista sa  mga kantang kinatsila.

Sa edad nga sais anyos matod ni Cardinal Vidal labing unang higayon nga nakakita siya og usa ka pari nga dunay talagsaong bestida. Ang maong pari mao diay si Cardinal Dennis Dougherty nga kaniadto Archbishop sa Vigan ug nahimong Archbishop sa Chicago sa Amerika nga nagpakalawat kanila. Nagsul-ob siya og pulos puwa nga beste nga may taas kaayong puwa nga kapa nga gihulagway sa batang Vidal nga usa ka rayna. Alang sa batan-ong Vidal ang mga rayna ra atol sa fiesta sa ilang lungsod ang makasul-ob og kapa.

Mahimong lahi na unya ang mga kasinatian nga atong madunggan sa mga first communicant sa IEC  2016, tungod kay bag-o na silang henerasyon. Apan ang ka-inosente ug ka puro pa sa ilang mga panghuna-huna ang siguradong mopatigbabaw, mithi nga gihatagan og bili sa Labaw’ng Makagagahum.

ANG CARDINAL DENNIS DOUGHERTY CARDINAL VIDAL CEBU ARCHBISHOP EMIRITUS RICARDO CARDINAL VIDAL INTERNATIONAL EUCHARISTIC CONGRESS MAHIMONG MGA NGA PILIPINAS POPE ST. PIUS X VIDAL
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with