Bag-ong firetrucks

Nagmalampuson ang atong pagsaulog sa Sinulog 2015. Gani wala'y natala o nadawat ang atong kabomberohan bisan usa ka alarma sa sunog sa maong adlaw.

Hinuon dunay pipila ka mga insidente sa stampede kon pagduotanay sa mga tawo sa nagkalainlaing lugar sa parade route apan sa kinatibuk-an hapsay ug maayo ra ang dagan sa maong kasaulogan.

Sa pikas bahin, malipayon ang Bureau of Fire Protection (BFP)-7 sa pag-abot sa gikahinaman niini nga mga firetrucks nga gi-donate sa kagamhanan sa Daito City, Osaka, Japan.

Kini’ng maong kalamboan maoy bunga sa pagbisita ni Senior Superintendent Ma. Luisa C. Hadjula, regional director sa BFP-7, uban ni Mayor Teresa Alegado sa Consolacion didto sa mao nga dapit.

Gani karong Pebrero 2015, ipahigayon na ang formal turn-over ceremony sa maong firetrucks ngadto sa BFP-7 ug idistino usab kini dayon sa Consolacion Fire Station.

Ang maong donasyon dako kaayo og ikatabang sa kakuwang sa atong kahimanan kay lagi mahal man kaayo ang kantidad sa mga firetrucks.

Ang nakanindot sa maong kasabotan tali sa BFP-7 ug sa mga opisyal sa Daito City, Osaka, Japan kay matag tuig magpadala sila og dili mominos upat ka firetrucks ug uban pa’ng kahimanan nga magamit sa atong kabomberohan.

* * *

Sa kataposan, ang tibuok puwersa sa BFP-7 kinasingkasing nga mopahasubo sa kabanay sa among kauban sa buhat nga si FO3 Jamie Ross Gutib Romeo nga mitaliwan na sa laing kalibotan niadtong Enero 17, human kini nahiagom sa cerebral aneurysm. Our deepest sympathy and condolences sa pamilya.

Pagduot sa konsumidor

Sa mga higayon nga nagsige og layat ang presyo sa lana, ang higanteng mga kompaniya sa pagkaon ug ubang inadlaw nga mga panginahanglan nagsige sab og pasaka sa ilang presyo. Nitiyabaw ang mga konsumidor kay nisamot kabug-at ang ilang palas-unon sa mas mahal nga lana sa dungan nga pagburot sa inadlaw nilang konsumo.

Apan napahilom ra sab dayon ang mga pagsupak kay lisod lalison ang direktang epekto sa mas mahal nga lana ngadto sa gasto sa produksiyon sa mga produkto nga ginama sa mga makina ug mga pabrika. Gawas pa, giduphan dayon sa gobyerno ang mga negosyante nga igo lang naningil og mas makiangayong presyo sa ilang mga baligya.

* * *

Human nitibugsok ang presyo sa lana, wa kabantay ang mga konsumidor og bisan unsang pag-us-os sa presyo sa batakan nilang mga panginahanglan. Kapin na sa unom ka buwan nga nagsige og tidlom ang presyo sa lana sa merkado sa kalibotan ug, bisan kanunay’ng mauwahi, dinhi sa ato sa Pilipinas.

Kun nimahal ang palaliton dungan sa pagmahal sa lana sa nangaging katuigan, nganong wa may dinalian nga epekto ang pagbarato pag-ayo sa lana sa niaging unom na ka buwan? Nganong ang kaabtik sa gobiyerno pagdupa sa mga negosyante karibalan man lang sa kadugay nilang makasusi, sa way paghisgot kanus-a sila makasugod og panalipod, sa interes sa mga konsumidor?

* * *

Unang panagang sa mga negosyante mao nga ang ilang mga baligya karon nahimo niadtong mga buwan nga mahal pa kaayo ang presyo sa lana. Argumento nga wa gyud makapugong nila paghurot una sa ilang mga produkto nga nahimo sa barato pang lana sa wa pa paburota dayon ang ilang mga presyo.

Mas bangis nilang argumento mao nga di direkta ang epekto sa pagbarato sa lana ngadto sa gasto sa ilang produksiyon. Kay kasagaran sa ilang mga pabrika nagsalig sa suplay sa kuryente nga wa mobarato. Hinunoa, sama sa kaso sa Visayan Electric Co. (Veco) sa Metro Cebu, gitakda pang mosaka karong tuiga.

* **

Tungod sa sibaw nga paningil sa mga konsumidor, ang gobiyerno pinaagi sa Department of Trade and Industry (DTI), nidalidali pagdangop sa ilang kinaham nga lusot: Pagarpar. Nipasalig sila nga inanay nang mo-us-os ang presyo sa nag-unang mga palaliton sa mosunod nga mga adlaw. Niinsistir sab nga mapugos ang mga negosyante paglaslas sa ilang presyo tungod sa gawasnong kumpetensiya.

Ambot magpailad pa bang mga konsumidor sa bun-og nang pamakak: Una, way tinuoray’ng kumpetisyon kay ang inadlaw nga mga panginahanglan gikontrolar sa higanteng mga kompaniya nga wa igdungog nga magpaalkanse sa ilang ginansiya; ug ikaduha, ang makanunayon uyamot nga pakigkonsabo sa mga buhatan sama sa DTI maoy motino nga kanunay’ng maduot ang mga konsumidor, mahal man o barato ang lana.