Mga job order luoy kaayo

May mga balaod nga ginama sa tawo nga makiangayon, aduna usa’y dili, apan tungod kay balaod - balaod g’yud.

Sama  sa balaod alang sa mga “job order” (JO) nga kawani diin may gitumbok sa balaod nga kasagaran kuno sa mga job order pakyaw ang trabahuon nga angay lamang humanon sulod sa lima o unom ka buwan.

Kining balaora tinuod kaayo, kun ang tanang trabaho sa JO, putol-putol o pakyaw nga mahuman sulod lang lima o unom  ka buwan.

Busa sumala sa balaod ilegal ang paghatag kanila og  bunos ug uban pa’ng prebilihiyo nga sama sa gidawat sa mga permanente nga kawani sa kagamhanan tungod sa matang sa ilang trabaho.

Ambot unsa kaha’y pagtuo sa mga magbabalaod? Alang kanila usa lang ang matang sa trabaho sa tanang mga JO?

Kita’ng mga trabahante nasayud ta nga matag opisina sa gobiyerno managlahi ang klase sa trabaho sa mga kawani.

May mga opisina kansang permanente nga kawani magyaka na lang ug maghinuktok sa ilang lamesa ug magpaabot nga moabot ang alas singko sa hapon aron mopauli tungod kay ang ilang trabahuon gipasa man ngadto sa ilang mga JO.

May mga kawani nga anaa na sa supervisory position apan tungod kay may JO, ang ilang trabaho ipapas-an na sa ultimo nga JO.

Kini’ng bahina sa trabaho sa mga JO maoy wala maalinggati sa mga magbabalaod nga migama sa maong balaod, sanglit wala man tingale sila makaagi sa kinabus nga panarbaho.

Unya tungod kay balaod man, dili makatilaw og bisan usa ka sentimo nga bunos ang JO atol sa Pasko, kapaet. ([email protected])