Ang kagubot nga nakahasol sa mga molupyo

Gitinguha gayod sa kagamhanan nga maangkon ang hingpit nga kalinaw sa Mindanao sukad pa kaniadto sa nangaging pamunoan ug hangtod na karon nga gihimo na usab ang pagpinirmahay sa kasabotan sa kalinaw nga miresulta na usab og  lain pa nga kahasol sa mga molupyo.

Ang kagubot nga gikalambigitan sa  puwersa sa kagamhanan batok sa Communist Party of the Philippines (CPP), New Peoples Army (NPA), mga sakop sa Moro Islamic Liberation Front (MILF), Moro National Liberation Front (MNLF), Bangsamoro Islamic Freedom Fighters (BIFF) ug Abu Sayyaf sa Mindanao nga ang kalihokan mao ang pagpangidnap.

Ang nangaging presidente sa nasud nga naglakip kang kanhi Presidente Fidel Ramos  mihimo na og lakang kaniadto sa pagpinirmahay og kasabotan sa kalinaw sa iyang panahon sa kadagkoan sa MNLF nga gipangulohan ni Nur Misuari ubos sa MNLF-GRPH Tripoli Agreement  sa tuig 1976 diin ang gitanyag sa kagamhanan sa nasud nga semi-autonomy sa rehiyon.

Ang maong pagpinirmahay sa kasabotan sa kalinaw sa kagamhanan ug sa MNLF mao usab ang nakaingon sa pagbulag sa uban nga mga sakop sa MNLF ug nagmugna og ilang kaugalingong pundok nga maoy hinungdan sa pagtumaw sa MILF.

Nagpadayon ang kagubot sa mga dapit sa Mindanao nga gimugna sa MILF sa pagpakita sa ilang pagsupak nga miresulta  sa pagpamakwit sa mga molupyo ngadto sa luwas nga mga dapit ug gibiyaan ang ilang naandan nga panginabuhi.

Sa panahon ni kanhi Presidente Joseph Estrada maoy iyang gihimo ang pagpulpog sa maong grupo nga miresulta sa pagkakalas sa daghang kinabuhi ug  ang ordinaryong mga molupyo nga naglikay nga mapagan sa kagubot wala’y laing nahimo gawas sa pagpamakwit. Nahunong ang maong tinguha  ni kanhi presidente  Estrada kay nakasinati man kini og kakulian sa iyang pamunoan nga miresulta gayod sa pagkatangtang  niini sa katungdanan.

Samtang gihatagan na og katumanan ang kasabutan sa kalinaw sa Mindanao sa kagamhanan ug kadagkoan sa MILF wala usab makadawat niini ang uban pa nga mga pundok nga naglakip sa BIFF nga miresulta na usab karon sa kagubot ug pamakwit nga   nakahatag karon og laing  kahasol sa mga molupyo.