^

Ibalik ang ROTC

TIKDOL SA PORDOY - John Rey Saavedra (Banat) - January 15, 2014 - 12:00am

Dagko na kaayo og plano ang China batok sa Pilipinas.

Nahibaw-an karong bag-o nga nagplano ang China nga sakmiton ang Pag-Asa Island sa Spratlys Group of Islands niining tuiga.

Tingale, gamay ra kaayo nang planoha, apan aduna pay mas dakodako nga plano nga wala nato mahibaw-i.

Tungod kining tanan sa kahuyang sa atong militar ug kapabilidad sa atong Armadong Kusog sa natad sa paghipos og mga intelligence report gikan sa uban nga nasud - ilabi na ang China - nga adunay dakong interes sa atong kaugalingnan.

Sa matag kalihukan sa Army Reserve, akong makita ang “Philippine Army Vision: By 2028, a world-class Army that is a source of national pride.” Tiaw mo na, sa 2028 pa ang target sa atong Army nga mahimong world-class. Para nako, layo ra kaayo ang 2028, ilabi na nga nag-atubang kita og suliran sa atong kaugalingnan tungod sa makusganon nga pagduso sa interes sa China sa mga teritoryo sa West Philippine Sea nga iya sa Pilipinas.

Gisugdan karon ni Presidente Noynoy Aquino ang pagpamalit og kagamitan panggubat, apan hinay kaayo ang pagpakusog sa kapabilidad sa mga infantry, field artillery, corps of engineers ug uban pa nga gikinahanglan sa panggubatan.

Dili man maayo nga “alarmist” kita, apan dili usab maayong magsige na lang kita og pangoral sa atong palibot aron dili moapil sa diskusyon sa mga butang nga may labot ang kaugalingnan sa atong Mahal nga Pilipinas.

Sama pananglit sa atong Reserve Force ug sa Standby Force, kulang kaayo ug dili seryoso sa mga training.

Ug bisan ning pagsige na og panguhit sa China, gahi lang kaayo gihapon ang mga Pilipino sa pagpabalik paghimong mandatory sa Reserve Officer Training Corps (ROTC) sa mga tinun-an sa kolehiyo. Padayong gisuportahan sa mga kolehiyo ug unibersidad ang National Service Training Program (NSTP) nga naghimo na lang sa ROTC nga optional sa mga lalaki ug babaye.

Pananglit simbako og i-okupar kita sa puwersa militar sa laing nasud, diyutay ra ang mo-report aron modepensa sa Pilipinas kay wala na ang ROTC. Kun mahitabo kining akong gikabalak-an, hasta na ang mga tanod ug sikyu nga hubakon ug atraytison paapilon sa pagbitbit og ripley aron pagubaton batok sa mga dagko ug abtik nga kasundalohan sa kontrang nasud.

Busa, maayo gyud nga ibalik ang ROTC. Kanang mga walhon nga mga kongresista, ilabi na kanang mga party-list, ayaw lang usa kamo og supak pagpabalik nga mandatory sa ROTC aron dili kamo mapasanginlan nga tua modapig sa atbang nga nasud.

ARMADONG KUSOG ARMY RESERVE ATONG NATIONAL SERVICE TRAINING PROGRAM PAG-ASA ISLAND PHILIPPINE ARMY VISION PILIPINAS PRESIDENTE NOYNOY AQUINO
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with