Hakog nga tumong
KUMBATI - Rico Lucena (Banat) - January 3, 2013 - 12:00am

Daghan ang nakapangutana, unsa pay gibuhat ni suspended governor Gwen Garcia sa iyang buhatan nga tanang department heads wa ‘ naman niya niyukbo ug nisunod sa iyang mga mando.  Daghan ang nakapangutana, unsay anaa sa buhatan ni Garcia og nga bisan sa mga pag-aghat nga gipanghimo, di’ matalikdan sa suspendidong gobernador ang maong katungdanan.  Daghang mga pangagpas ang nanggawas luyo ining dakong kontrobersiya nga gisangitan sa Kapitolyo.  Ug usa lang ang sigurado, daghan ang nisakay lang sa isyu ug daghan personal nga interes ang nipatigbabaw.

Di’ sayon alang sa usa ka local chief executive nga momata og buntag nga wa’ nay gahum sukwahi sa iyang naandan su’d sa halos siyam ka tuig.  Labaw nga di’ sayon dawaton ang suspensyon nga gipatuman sa nahabiling unom ka buwan sa termino.  Ang usa ka opisyal kansang mandato gihatag su’d sa tulo ka termino, di’ sayon nga tapuson lang sa usa ka suspensyon.  Bisan kun ilimod o ipadaplin—ang labing sakit mao nga mao na ni ang labing dakong sagpa alang sa usa ka opisyal nga buot untang tapuson ang termino sa usa ka hapsay ug malinawon nga paagi.

Di’ nato kwestyonon ang sirkumstansya tungod kay daw wa’ tay gahum batok sa mga tawo nga usahay maoy mopatuyok niini.  Mas labing maayong tan-awon ang pipila ka punto luyo ining suspensyon ni Garcia.  Una—ang mga sakop sa UNA kinsa nagtuo nga gipamolitika sila sa gobyernong Aquino.  Susamang reklamo ‘sab ang atong nadunggan gikan sa oposisyon niadtong panahon ni Arroyo, Estrada, Ramos ug Aquino.  Kung adunay ipatigbabaw nga prinsipyo, di’ dayon ni madawat tungod kay ang tanan giisip natong adunay bahid politika.  Hangtud karon--- wa’  pa gyud diay ‘ta makairog sa maong kultura.  Politika ang gipasanginlan ug politika ‘sab ang nakitang posibleng hinungdan

Nagpanon ang mga kaalyado ni Garcia sa pagpakita sa ilang suporta sa gisuspenso nga lider.   Daghan nilang mga politiko ang nag-ingon nga nabiktima sa pamolitika si Garcia ug kini ang napahimungtan sa Malacanang.  Mas labing maayong tan-awon ang personal nga interes sa mga politiko nga nipadayag sa ilang simpatiya ni Garcia.  Di’ ba modagan man ‘sab ni sila sa piniliay karong Mayo ug sa mga mosunod pang piniliay?  Di’ ikalimod ang makabungog nga mandato nga naangkon ni Garcia.  Nilabaw og kapin tunga sa milyon ka boto ang labaw sa ikaduhang termino ug usa ka gatos ka libo ka boto sa ikatulong termino.

Di’ ikalimod nga pinaagi sa maong kalampusan sa pagdani sa suporta, maaghat ‘sab ang mga adunay personal nga interes sa politika sa pagpakita sa suporta ni Garcia tungod kay nagpasabot ni og suporta ‘sab nga makuha unya gikan sa mga dumadapig ni Garcia.   Ang ilang pagduaw sa Kapitolyo ug pag-ingon nga angayan nga di’ masuspenso ang goberno, makabuhi sa dugo ni Garcia.   Apan ang tinuod nga tumong mao ang pag-apilar og suporta sa mga dumadapig ni Garcia karong Mayo.   Sa makadaghang higayon--- gilibog ‘ta  sa politika.  Ug ang nahitabo sa Kapitolyo usa ka timailhan sa mga panghitabo nga usahay di’ mahibaw-an, sa usa ka kasinatian nga maoy maghatag og leksyon ug sa usa ka desisyon nga ang katapusang tumong mao ang paghibalik sa imong pagpa-ubos.   Kung unsa man sangputanan ning tanan---sigurado nga adunay nakabenepisyo, adunay personal nga katuyoan nga natagbaw ug adunay naglagot o nagngisi ba kaha sa tago.

* * *

Email: rico_lucena@abs-cbn.com or ricolucena@yahoo.com.

AQUINO DAGHAN GARCIA KAPITOLYO LSQUO USA
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with