Wa'y kompiyansa

Nagdungan og kamatay ang rapist, drug lord og ang mayor nga nabantog sa iyang pagka-Trapo (traditional politician). Kay lagi sa mga buhi pa kining mga tawhana, naglunang man kini sila sa pagpakasala og namatay na lang nga wala makighiuli sa Ginoo.

Unang miabot ang rapist sa ganghaan sa impiyerno og gisugat nga mahinangpon si Satanas. Saya kaayo ang nawong ni Satanas nga mi-welcome sa maong rapist. "Dayon amigo! Og tupad sa akong trono. Busa milingkod ang rapist tupad sa iyang amo. Misunod dayon ang drug lord, ning tungora usa ka makabungog nga tulonggon ang miabiba kaniya og sa tumang kamainiton gigakos siya ni Satanas nga malipayon. "Dayon migo!" Lingkod sa akong wala aron magsugod na kita sa atong pot session. Ug nanglingkod silang duha.

Ning tungora hapit na moabot ang mayor og nakakita siya kon unsa diay ka-welcoming ang hari sa mga yawa. Nagtuo siya nga mas ngilngig ang pasidungog nga iyang madawat. Mayor gud siya! Apan nahasulod na lang siya wala gyud siya sugata ni Satanas. Hinuon adunay gamay'ng silya ang gitatakan: "Reserved for Mayor" For Official Use Only. Butang nga gikasuko sa mayor.

Nagngisi si Satanas nga miingon kaniya: "Pasensiya na Mayor nga diha lang ka lingkod. Kay sukad masukad, wala ko'y salig sa mga politico. Imo pa lang kong ilogan sa akong trono kon mosugat ko nimo!"

Pamalandong

Ang mga tawong agap og hakog sa tanang butang, dili maantigong mosalig sa uban.