Ang sugo

Duha na ka adlaw nga wala mopauli si Conrad sa ilang balay ug nahingawa na ang mga ginikanan  nga sila si Tonyo ug Lina.

Nagpanuigon pag 10 anyos si Conrad ug naa na kini sa ikatulong ang-ang sa elementarya. Gani midangop na man karon sila si Tonyo ug Lina sa kapolisan sa lungsod aron magpakitabang.

"Basin og nikuyog sa iyang klasmet, Misis," ni Cardo Ahos, hepe  sa kapolisan. "O di nangluod to ninyo kay dunay gihangyo nga wala ninyo ihatag. Ingon ra ba gyud nang mga bata ron dali rang mangluod."

"Nahingawa lagi mi uy tsip," ni Lina ngadto sa polis."Usa ka oras nga mawala si Conrad sa balay kulbaan man gani ko, unsa na kaha ning duha ka adlaw na...sus...uy, hain kaha tong bataa."

"Suwayan kuno nato sa mama Insiang, Lina," ni Tonyo nga nabalaka usab. "Layo man to unsa man nagbaktas lang to siya kun pananglit tua siya mopaingon didto?"

Namauli una sila,  ug pag-abot nila sa balay diha na si Conrad nagpahiyom kini nga misugat kanila. Sagol kalipay ug kalagot ang gibati ni Lina. "Sus, Conrad diin man tawon ka maglaroylaroy nga karon ka pa man mopauli. Unsa may nahitabo nimo ha?" mitaas ang tingog ni Lina.

"Gisugo kong Kanot ma nya gihatod ko didto sa ka Mr. Lee ug kay nahatod man nako, nia o gisuholan ko'g kuwarta. Daghan kaayo ning kuwartaha, ma," ug gihatag ni Conrad ang kuwarta ngadtong Lina.

"Unsa may imong gihatod ha Conrad?" ni Lina nga ingon sa naglagot na.

"Akong nadunggan si Mr. Lee ug ang iyang misis nga nag-estoryahay shabu man kuno to," ni Conrad nga misugilon.

"Unsa to, shabu! uy, kakuyaw gud ana! Hala, Tonyo mamalik ta sa opisina sa kapolisan kay atong isumbong si Kanot. Drug lord diay ni si Kanot maong dato kaayo dinhi sa ato," ni Lina nga midalig kanaog sa hagdanan ug misunod si Tonyo. Pagkabuntag sayo gidakop si Kanot ug may gitug-an si Kanot nga usa sa mga protector ning maong ilegal nga negosyo mao ang ilang mayor. (Kataposan)