Pildero si Goryo

Siguro gyud palit Goryo og bugas nga tunga sa sako tingali’g apilon na nimo'g pilde sa bulangan sa lungsod. Importante ra ba gyud ang bugas," pahimangno ni Karya usa ka buntag niana.

"Apan kun modaug diay kanang kuwarta nga igpapalit og bugas di jackpot ka," tubag ni Goryo.

"Ma-jackpot ka unya! Bantay lang hutdon ko na'g tagod kanang walo mo ka hiniktan sa tangkal!" miulbo sa kasuko si Karya samtang namilo sa iyang saya.

"Ari na ko Karya kay nagsugod na ang sultada ron," milakaw dayon si Goryo kugos si Ogis nga hiniktan.

Pag-abot sa bulangan, nakakita dayon og hiniktan si Goryo nga iparang kon isakbang kang ogis.

Biya si Ogis. Nagkanayon si Goryo sa hilom. "Para madakodako ang pusta ni Ogis apilon nako ni’g pusta ang igpapalit og bugas. Basin na lang modaug si Ogis batok sa tubaon."

Sa bag-o pang sultada naigo ni Ogis sa buwang ang tubaon sa may paa niini apan abtik usab kaayo nga nakabalos og labok ang naulahi ug gikupogan og maayo si Ogis resulta sa pagkaigo niini sa may dughan.

Gikulbaan si Goryo sa hilabihan. Natusok sa buwang ang dughan ni Ogis.

Patay na si Ogis. Midali-dali og gawas si Goryo sa bulangan ug midiretso’g uli sa ilaha nga balit-ad ang mga bulsa sa pantalon ug huyhoy ang mga abaga.

"Asa na Goryo ang bugas nga tunga sa sako? Pildero ka unsa? Hurot ang kuwarta ug nabihag pa gyud imong hiniktan," sukot dala'g kasuko si Karya.

Gikuha dayon ni Karya ang hait nga sundang ug mipadulong sa tangkal sa mga hiniktan.

Gitagod-tagod ni Karya tanang hiniktan. Giapil pa gyud og tagod-tagod ang tangkal sa hait nga sundang.

"Mao kanay angay sa mga hiniktan mo Goryo ug sa tangkal. Naungo ug nabuang ka na gyud sa sugal!" nagpaminti sa kapungot si Karya. (Kataposan)