Daman sa udtong tutok

Gula 23

Sa paghiabot sa akong gisakyang barko sa Cebu, mikanaog dayon ko ug milakaw nga way tumong. Hangtud nga mihilab ang akong tiyan sa kagutom. May subra pa man ko nga kuwarta sa akong gipamelete mao nga miduol ako og bakery. Mipalit ko’g pan.

Diha ra sab ko tungod sa bakery magkaon sa gipalit nako nga tinapay. Samtang nagkaon, nabasa nako ang gisulat sa papel nga gipatapot sa bungbong sa bakery. “Wanted Housemaid. Please Inquire at the Bakery.” Mao nga nagpakisusi ko sa nagbantay sa bakery mahitungod sa pahibalo sa panginahanglan og katabang sa panimalay.

“Ang tag-iya niining bakery maoy nagkinahanglan, moaplay ka?” tubag sa tindera sa bakery.

“U-unta,” maukon-ukonon nako nga tubag.

“Tua sa V. Rama ang ilang balay,” nagkanayon ang tindera. “Pero moanhi kadto si sir Luis karong taudtaod, paabota lang.”

Mitando ko. Nakahukom ko nga hulaton ang giingon niyang sir Luis nga mao tingali ang iyang amo nga tag-iya sa bakery.

Dako ang akong tinguha nga makasulod dayon og trabaho, ilabi na nga wala ko’y kabanay nga kadangpan dinhi sa Cebu. (Sumpayan)