Ang bungtod sa Kandangas
Sugilanon - Fred Fuentes Monternel (Banat) - September 28, 2015 - 10:00am

Sa pagdalikyat ko’g duaw sa Sityo Kandangas, mitungas g’yud ko sa nagbuntaog ug mahabog nga bungtod niini. Kanhi, sa akong kabatan-on, dili gayud nako sipyaton sa pagtungas ang taluktokan sa bungtod sa Kandangas, aron aninawon ang kasikbit nga mga barangay ug ubang kanait nga dapit. Tipik na sa akong kabatan-on ang bungtod sa Kandangas.

“Fred, kun madebelop na ang bungtod sa Kandangas, mahimo kini nga tourist destination tungod sa iyang matahom nga scenic view ug sa iyang pagka-historical spot...!” mao kini ang gisulti nako ni Do Juan, ang magulang ko nga lalake. Gituyo ko nga sayo sa buntag ang pagtungas sa bungtod aron dili pa kaayo init ang bidlisiw sa adlaw didto sa taluktokan niini. Dugay na nga wala ko mahibalik sa among sityo.

Nagapos ako sa matag adlaw ko nga mga buluhaton didto sa siyudad. Sa paghimuntog ko sa taluktokan sa bungtod, gibulhot ko dayon ang lawom nga ginhawa. Pastilan, nindot na man diay kaayo ang taluktokan sa bungtod sa Kandangas. May giugbok na nga dagko nga krus uban ang imahen ni Ginoong Hesus nga nagdupa ug gilansang sa krus.

Nadebelop na diay ang taluktokan sa bungtod sa Kandangas, alang sa pagpahigayon og Station Of The Cross matag tuig sa Semana Santa.

Akong nasayran nga daghan na nga mga tawo ang mamalandong didto sa matag estasyon sa pag-antos ni Hesukristo pagpas-an sa krus matag Biyernes Santo ug sa tibuok kasaulogan sa Semana Santa.

Sa taluktokan sa bungtod, milantaw na ‘sab ko sa halayong unahan. Naaninaw ko ang nagluyong dagat sa silingan ug kasadpan. Nalantawan ko ang mga kasikbit nga baryo sa Caduawan, ang lungsod sa Tabogon, siyudad sa Bogo, lungsod sa San Remigio, lungsod sa Tabuelan, lungsod sa Tuburan ug ang isla sa Bantayan.

Naaninaw ko usab sa kasadpan ang bungtod sa Negros. Ang bungtod sa Kandangas mao ra ang mahabog nga bungtod nga makita sa mga lumolupyo sa Negros. Sa matag tuig, nasayran ko ‘sab gikan kang Do Juan, nga daghang Haponanon ang modalikyat pagduaw sa among sityo kay dinhi man ‘sab diay mosurender ang daghang sundalo nga Hapon panahon sa ikaduha’ng gubat sa Kalibutan. Ang Sityo Kandangas maoy gihimo nga lubnganan sa nangamatay nga mga sundalong Haponanon.

Nakapahiyom ko. Naseguro ko nga ang bungtod sa Kandangas dugukon g’yud sa daghang tawo ug mga turista sa umaabot, ilabi na kun hingpit na nga madebelop sa gobiyerno ang pagpatahom sa tibuok palibot niini. (Kataposan)

ACIRC ANG ANG SITYO KANDANGAS BIYERNES SANTO BUNGTOD DO JUAN GINOONG HESUS HAPONANON KANDANGAS NGA SEMANA SANTA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with