Gipareglahan si Pareng Andot
Sugilanon - Apronianito F. Miramon (Banat) - November 17, 2014 - 12:00am

“Patay na si Pareng Andot” gikan sa iyang asawa nga si Melba. Nahitimbakuwas siya  ug daw dili makatuo sa hitabo.

“Mao ba?” sukot niya. “Unsay namatyan?”

“Gipareglahan kuno kagabii,” tubag niini. Nanaog sa ilang balay nga wala gani makapanghimuta si Nario. Wa na lang usab siya mananghid sa iyang asawa. Paspas ang iyang mga lakang aron iyang masusi unsa ka tinuod ang balita nga dala sa iyang asawa.

“Kinsa man tawon ang way puangod nga nagpasipala nimo Andoot!” hilak-minatay sa asawa ni Andot nga si Marsing.

“Patay na ang imong amigo Pre...!” sumbong ni Marsing ngadto kang Nario.

“Diha namo mabangali ang iyang patay’ng lawas  sa may hagunoyan unaha’g gamay sa tubod,” pamahayag niini bisan og nagbahog ang luha’g sip-on sa paghinilak.

Milili siya sa haya sa iyang kumpare. Nahaatras siya sa kahikurat pagkakita sa samad sa liog ni Pareng Andot nga maoy hinungdan sa hinanali niining kamatayon. Hapit malunggo ang liog niini. Ang maong samad nakapahinumdom ni Nario sa nahitabo niya kagabii gikang nananggot. Nagabhi-an siya sa maong gimbuhaton kay nalingaw siya’s hantak sa ka Ponso-Tikla nianang adlawan.

Samtang naglakaw si Nario duol sa may tubod kalit nga may misakdap ug miatake kaniya nga wakwak. Mitapuko ug gibugno siya niini. Paakon na unta ang iyang liog aron supsopon iyang dugo apan kilatnon siyang milanit sa iyang sanggot diha sa sakuban. Ug hinurot ang tanang kusog gisikbot niya ang wakwak tumong sa liog.

Nakasiyagit kini sa tumang kasakit. Unya danag kini nga milupad. Pagkataud-taod nakita ni Nario nga nahulog ang wakwak diha sa may hagunoyan. Milagubo kini pagkahagsa sa yuta. Wala na lang usab susiha ni Nario kung si kinsa ang maong wakwak. Pero ang nasiguro niya nga napatay niya kadto.

Sagol dagan nga mibiya siya sa maong lugar. Nagkasukam-ag siya tungod sa kangitngit. Sa iyang huna-huna kinahanglang makapalayo siya kay basi’g aduna’y kauban ang maong wakwak. Basi’g mao na sab ang muatake kaniya.

Nagsanduloy ang kakutas ug kakulba paghimuntog niya sa tugkaran sa ilang balay.

Unya may natibuok nga konklusyon sa huna-huna ni Nario.

“Kung mao, si Pareng Andot ang wakwak nga napatay ko kagabii!” hagawhaw ni Nario sa kaugalingon. (Katapusan)

 

 

ANDOOT ANDOT IYANG NARIO PARENG ANDOT PATAY SIYA UNYA
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with