Thermometer
Sugilanon - Javier Y. Tapulado - Banawa, Cebu City (Banat) - November 14, 2014 - 12:00am

Naospital si Boyde kay na-dehydrated. Sulod sa bugnaw’ng lawak, nangutana ang nurse aide kun may dala ba silang thermometer.

Si Tunang, inahan ni Boyde, nakurat. “Unsa? Mahalong ospital, wala’y thermometer?”

“Mas maayo man gud, Mam, nga duna moy kaugalingon kay ang inyo rang pasiyente maoy makagamit. Di kini mapaslak ngadto ni bisan kinsang ilok.” Daling pamahayag sa nurse aide.

“Bitaw, no? Na hala, orderi lang mi’g usa, Miss. Itsards la’g apil sa among hospital bill.” Hukom sa mapinanggaong inahan. Apan naunsa ba, nga duha pa lang gani ka adlaw ang pag-usar sa thermometer, nawala man kini.

“Wa diay mo kaugalingong thermometer, Mam?” Sukna sa laing nurse aide nga naasayin niadtong orasa.

“Duna, Miss uy! Dinha ra man to ibutang pirme sa lamesita. Wala na diay diha?” Nainat og diyotay ang kilay ni Tunang.

“Mao ba, Mam?” Ug gisiksik gilayon sa nurse aide ang kinatibuk-ang bahin sa lamesita. Apan...“Hala, Mam, wa man gyud!”

“Hain man diay ang among thermometer, Miss?” Sapaw tubag-sukna ni Boyde. “Kamo ra bayay sige’g gamit niadto. Kay kamo may tigkuha nako’g vital signs. Busa, kun mawala man, dali ra gyud kining makit-an. Kana, kun tanang tigsudlanan sa akong lawak, honest!

Natiurok sa iyang gibarogan ang nurse aide pagkadungog sa gipamulong sa pasiyente. May kahiamgo nga miabli sa hunahuna. Husto tuod. Kun honest lang silang tanang alagad sa ospital nga nagsilbe ni Boyde, mahibalik ra dayon ang maong thermometer.  

Apan nakagawas na lang si Boyde sa ospital, wala na gayud mahiuli ang digital thermometer nga gibayaran nila’g mahal. Abi nila’g ang thermometer gamiton lamang pagsukod unsa ka taas sa hilanat. Magamit pud diay kini pagsukod unsa ka honest ang mga empleyado sa ospital. (Kataposan)

ABI APAN BITAW BOYDE BUSA DINHA DUNA SI TUNANG THERMOMETER
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with