Jezebel

Gula 68

“Mosulod na ko,” nananghid ko ni Edward.

“Sige,” niya pa. “Magteksanay lang unya ta, ha?”

“Sure.”

Pagsulod nako sa boarding house, natukmaan nako ang tanang boarders diha sa sala sa balay. Nagpatawag diay og meeting ang tag-iya sa balay.

Mao gayoy pagsugod sa meeting sa akong pag-abot. Mitambong na lang sab ko sa meeting kay alang man kini namong tanang mga boarders. Naminaw ko’g maayo dihang misulti na ang tag-iya sa balay. Mi-text si Edward nako samtang nag-meeting mi apan wala ko mo-reply. Gusto nakong matuhog ang tanang isulti sa among landlady.

Maoy gibatbat sa tag-iya sa balay ang mga patakaran nga gusto niyang ipatuman sulod sa boarding house. Adunay curfew sa alas 10 sa gabii. Gidili ang pagpasulod og bisitang lalaki sa kuwarto, ang mga bisitang lalaki kutob lang sa sala. Ang mga ginikanan ug igsuon ray makasulod sa kuwarto. Giawhag sa tag-iya ang pagsinabtanay sa tanang boarders ug daghan pang laing mga patakaran nga iyang gidetalye sa among atubangan.

Human sa meeting, misulod ko sa kuwarto. Mi-text dayon ko kang Edward. Akong gitubag ang daghan na niyang text messages nga nasulod sa inbox sa akong cellphone. Gipasabot ko siya nga nadugay ko’g reply niya kay nagpatawag og meeting ang tag-iya sa akong boarding house. -- Sumpayan pa