Online selling og bata gi-monitor

CEBU, Philippines — Dunay nasakpang mga Facebook Pages ang Department of Social Welfare and Development-National Authority on Child Care (DSWD-NACC) nga matud pa nagpakaaron-ingnon lamang nga adoption pages, apan namaligya diay og mga bata ngadto sa mga magtiayong wala magkaanak o dili magkaanak apan dunay kwartang ikabayad aron makaangkon og matawag nilang anak.

Matud pa nga dunay 20 ngadto sa 30 Facebook accounts ang nalambigit sa buy and sell og mga bata, matud pang NACC executive director ug DSWD Undersecretary Janella Estrada sa press briefing kagahapon.

“We have been monitoring the sale since last year and in February, we coordinated with the Philippine National Police to apprehend the people involved in these pages,” matud pa niya.

Matud pang DSWD Secretary Rex Gatchalian, daghan na silang nadungog bahin aning pagpamaligya og mga bata pinaagi sa social media ilabi na sa Facebook.

Siya mipasidaan nga tanang matang sa adoption nga wala magsubay sa “national care guidelines” sa gobiyerno makonsiderar kini nga human trafficking ug child laundering  ug usa kini ka krimen.

Si Gatchalian miingon nga dunay usa ka 8-anyos nga batang ilang giluwas kauban sa Philippine National Police-Women and Children Protection Center. Naaresto ang 29-anyos nga inahan sa bata nga taga Tondo, Manila ug ang ahente nga si 37-anyos nga taga Bacoor, Cavite.

Matud pa gisuwayan og baligya sa inahan ang anak og P50 mil ug kini gipatungan og P40 mil sa ahente. Ang bata naa na karon sa Augustinian Sisters of Mother Teresa Spinelli sa Tagaytay City.

Hinuon dinhi sa Kabisay-an, ang DSWD-Central Visayas walay na-monitor nga sama niini nga kaso dinhi.

Apan sigon ni DSWD-7 Director Shalaine Lucero nga ang ilang social marketing unit kanunay nga nag-monitor sa unsay naa sa Facebook kay aduna sila'y tawong gitahasan paghimo niini.

Si Police Lieutenant Colonel Gerard Ace Pelare, tigpamaba sa PRO-7 mibutyag sab nga wala sab sila'y na-monitor nga ingon ani nga klase sa modus.

Apan ilang giawhag ang publiko nga kung naa may mahibaw-an nga naghimo ani mo-report dayon sa otoridad kay kini usa ka krimen.

"This is violative of at least two laws Republic Act 9208 which is the Human Trafficking Act, violative pud ni obviously for violation of Republic Act 7610 or Child Abuse, naa pay ubang violationa ani...This should be a warning to everyone, wala ta kabibawo wala lang nato mamonitor but naay naghimo ani, watch out," matud ni  Pelare. – IBM BANAT NEWS