Armado napusilan patay

CEBU, Philippines — Patay ang usa ka armadong lalake human matud pa nisukol sa mga sakop sa Mabolo Police Station 4 sa Cebu City Police Office  diha sa Sitio Back Sugbutel, Barangay Carreta, Cebu City niadtong Lunes sa udto, November 17, 2025.  Ang suspek mao si Angelito Miñoza Mendoza, 51, nagpuyo sa Sitio Kalinaw, Barangay Carreta ning siyudad.

Una niini, ang Mabolo Police Station 4 nakadawat og tawag gikan sa concerned citizen labot sa presensiya sa armadong tawo sa lugar nga nagbadhas-badhas.

Pag-adto sa mga polis sa lugar didto sila miagi sa gamay nga eskinita aron dili makabantay ang suspek.

Apan pag-abot nila didto, nakabantay gihapon ang suspek ug dali-daling nidagan hinungdan nga gigukod kini.

Naabtan kini sa mga polis apan dunay nahitabong linayugay ug nakahigayon matud pa og bunot sa giluklok nga armas sa iyang hawak hinungdan nga kini napusilan.

Natumba ang suspek sa yuta apan nagkisi-kisi gihapon hinungdan nga gitabangan kini og hawid aron madisarmahan.

Gidala kini sa Cebu City Medical Center apan nakabsan gyud kini sa kinabuhi.  Na-recover sa crime scene ang usa Executive Caliber .45 pistol nga dunay pito ka bala.  IBM BANAT NEWS