Duha angol sa pagpamusil
CEBU, Philippines — Angol ang usa ka 22-anyos nga lalake human kini gipusil samtang nagduwa sa computer shop sa Sitio Upper Sto. Niño, Barangay Kinasang-an, Siyudad sa Sugbo niadtong Domingo sa gabii, Oktubre 12, 2025.
Ang biktima mao sa Christian Laspoña Molina, 22, nagpuyo sa E. Sabellano Street, Barangay Poblacion Pardo ning siyudad.
Sa imbestigasyon sa Inayawan Police Station 7 Cebu City Police Office ang biktima nagduwa og computer dihang niabot ang wala mailhing lalaki ug gipusil kini sa tangkugo.
Daling nisibat ang maong lalaki samtang ang biktima gidala dayon sa Cebu City Medical Center. Ang mamumuno nagsuot og blue jacket, black short ug blue bonnet. Padayon ang imbestigasyon sa kapulisan aron masuta kun unsay motibo niini.
Samtang angol ang usa ka babaye human gipusil og pugakhang sa iyahang kaipon tungod sa selos diha sa Sitio Upper Panabang, Barangay Apas, Siyudad sa Sugbo niadtong Domingo sa gabii, Oktubre 12, 2025.
Ang biktima 49 anyos samtang ang suspek ang kaipon niini nga si alyas Eming. Sa impormasyon sa Mabolo Police Station 4 Cebu City Police Office, naglalis ang duha tungod kay nagselos ang suspek sa amigo sa biktima.
Nakuratan nalang ang biktima kay kalit siyang gipusil sa suspek og pugakhang sa tuo nga dughan. Natabang ang biktima sa iyahang igsuon ug gidala sa pribadong tambalanan.
Na-recover sa kapulisan sa crime scene ang upat ka shotgun pellets samtang niikyas ang suspek. (BANAT NEWS)
- Latest
