Bantal-Discipline Zone magsugod karong Lunes

CEBU, Philippines — Bantal Discipline zone ug truck ban sa dakbayan sa Sugbo ipahigayon sugod karon adlaw nga Lunes matud pa ni Raque Arce, ang pangulo sa Cebu City Transportation Office. Matud pa ni Arce, duha ka semana na sila nag deploy og mga personnel sa Banilad Talamban ug Pit-os alang sa pagpatuman sa discipline zone sa maong dapit.

Sumala pa ni Arce, sa maong discipline zone tanan mga balaod sa trapiko ilaha gayud ipatuman sa maong dapit.

Gitug-an ni Arce, aduna silay gipatuman nga "Talamban Circle" One-way scheme aron sa pagpalambo sa traffic flow sa barangay talamban, diin ang mga apektado nga dalan mao ang Gov. M. Cuenco Avenue, Highway 11 ug Talamban Road.

Dunay mga traffic flow nga gipatuman para sa Northbound Vehicles, Southbound Vehicles, Highway 11 ug Talamban road, kung diin ang clockwise traffic loop nagtinguha sa pagkubos sa congestion ug pagpalambo sa road safety.

Gipadayag ni Arce, aduna silay mga dugang guidelines nga gipatuman sama sa mga oras nga mahimongwala ang tanan restrictions ug sa mga no left turn nga mga oras.

Gitug-an usab ni Arce, nasabotan usab nila uban sa tigum sa mga barangay kapitan ug barangay representatives sa pagpatuman sa truck ban sa tibuok dakbayan sa Sugbo sugod sa adlaw nga Lunes gikan sa alas -6 :30 hangtud alas-8  sa buntag ug alas 4 sa hapon ngadto sa alas 7 sa gabii.

Lakip sa pagpatuman sa truck ban mao ang mga garbage truck sa dakbayan sa Sugbo ug sa mga mosulod gikan sa Mandaue City ug Lapu-Lapu City. IBM BANAT NEWS