84-anyos nga babaye gianod sa sapa

CEBU, Philippines — Patay na  nga napalgan ang usa ka 84-anyos nga dalagang ulay nga gikatahong naanod samtang kini milabang sa sapa sa Sitio Cambaga, Barangay Ginabucan sa bukirang bahin sa Lungsod sa Catmon alas-5 pasado ang takna niadtong Lunes sa hapon Hunyo 16, 2025.

Si Police Executive Master Sergeant Ben Navales sa Catmon Police Station miingon nga usa ka 62 anyos nga lalaki nga molupyo sa maong dapit maoy nakakita sa paglabang sa sapa sa maong senior citizen apan gianod kini.

Ang namatay mao si Gregoria Colita Podot, residente sa maong dapit.

Nangayo kini og tabang sa Municipal Disaster Risk Reduction and Management Office (MDRRCO) ug gihimo gilayon ang search and rescue operation.

Apan dugang pa ni Navales nga napalgan kini apan patay na alas 11 na pasado ang takna sa gabii sa pipila ka metros ang gilay-on gikan sa dapit nga gilabangan niini.  Sa nasayran nga gikan pa nga nag-atiman ang maong tiguwang sa iyang mga gitanom nga mga utanon sa bukid , apan pag ala-1 pasado  ang takna sa hapon kalit lang mibundak ang kusog nga ulan nga miresulta sa pagbaha sa maong sapa.

Sumala pa sa nakakita, daw nagtuo ang namatay nga madala ra niya ang gilawmon sa tubig apan dihang didto na kini sa tunga-tunga gianod kini sa kusog nga bul-og sa tubig gikan sa bukid. Anthony Despi, CNU Intern, IBM BANAT NEWS