NGO ug development worker sa nasud padayong gilutos?

CEBU, Philippines — Bisan pa sa pagtangtang sa Pilipinas sa grey list sa Financial Action Task Force (FATF) nipadayag ang mga grupo sa civil society sa Sugbo nga nagpadayon gihapon ang pagpanglutos sa mga non-government organizations (NGO) ug mga development worker sa nasud.

Atol sa press conference nga gipahigayon kagahapon, ang Asser Development Initiatives (ADI) nisaway sa gobiyerno sa kapakyas niini sa pagtuman sa iyang katungdanan nga protektahan ang civic space subay sa konstitusyon.

Matud sa mga representante sa nagkadaiyang progresibong grupo sa Sugbo nga mas nikusog pa ang kampaniya sa gobiyerno batok sa civil society tungod sa padayong pagpanglakat sa Anti-Terrorism Act of 2020 ug Executive Order No. 70 nga nagtukod sa kontrobersiyal nga National Task Force to End Local Communist Armed Conflict (NTF-ELCAC).

Ang ADI, usa ka network sa mga non-profit nga organisasyon sa Sugbo nanawagan kang Presidente Ferdinand Marcos, Jr. nga bungkagon ang mga palisiya ug mga ahensiya sa estado nga nigaman sa mga paningkamot sa komunidad nga molambo.

Ang mga kauban sa ADI nipasangil nga kanunay sila nga gi-red-tag, gi-harass, ug gipaubos sa surveillance sa militar nga ilang giila nga kabahin sa mas halapad nga paningkamot aron i-delegitimize ang development work ug nagpasabot nga kaaway sa estado ang ilang paningkamot.

Si Geovanni Gabuli, chairperson sa environmental group nga Pundok Sagop Kalikopan nagkanayon nga ang ilang grupo nakapahimulos sa mga proyekto sa panginabuhian nga gisuportahan sa Center for Empowerment and Resource Development (CERNET) sama sa communal garden ug fishponds apan gipakasanginlan gihapon sila nga nagsuporta sa mga rebelde.

Ang gitawag nga CERNET 27 naglangkub  kinisa 27 ka indibidwal  nga kasamtangan ug kanhing staff ug miyembro sa CERNET nga giakusahan sa Department of Justice sa paglapas sa Terrorism Financing Prevention and Suppression Act of 2012 tungod sa giingong paghatag og P135,000 ngadto sa South Eastern Front sa NPA niadtong 2012.

Samtang si Ursina Terragosa sa Tipolo Residents Association nipasangil nga ang ilang rice retailing project nga gitabangan og tukod sa CERNET hapit na mamatay tungod sa pang-harass sa mga sundalo.

Gikataho nga gisuportahan ang ilang panawagan ang mga rekomendasyon ni UN Special Rapporteurs Ian Fry ug Irene Khan nga buwagon ang NTF-ELCAC tungod sa kalapasan sa tawhanong katungod. (BANAT NEWS)