Tinun-an nanulis, nanglugos

CEBU, Philippines — Usa ka 22-anyos nga lalake nga second year student sa kursong electrical technology ang gidakop sa kapulisan sa Mambaling Police Station 11 Cebu City Police Office (CCPO) human matud pa nanulis ug nilugos sa 21-anyos nga therapist nga iyang pasahero diha sa South Road Properties, Barangay Mambaling,  siyudad sa Sugbo niadtong Miyerkules sa kadlawon, Marso 12, 2025

Ang biktima nga dunay kaipon, usa ka therapist ug nagpuyo sa Barangay Tangke, Dakbayan sa Talisay.  Samtang ang suspect mao si alyas Nat, 22 anyos, tinun-an ug taga Barangay Poblacion, Talisay City.

Nagkanayon ang biktima nga nag-book siya sa usa ka ride hailing app, nakadawat siya og message nga pagawson na.  Uwahi na siya nakabantay nga dili diay kadto ang iyang gi-book apan kay nakasakay na siya iyaha nalang gi-cancel ang unang niyang gi book.

Pag-abot sa boundary sa Talisay ug Cebu City gikatahong mipadaplin ang suspek kay mangihi.

Apan pagbalik niini gikatahong nikalit kini og ingon "ambi imong cellphone" ug gitionan siya og screw driver. 

Nagkurog ang biktima sa kahadlok ug tungod niini nakaingon siya ngadto sa suspek nga basta ihatod lang siya pauli, buhaton niya ang tanang gusto sa suspek. Tuod man gilugos siya niini.

Human sa krimen gihatod siya sa suspek apan didto ra kutob sa Barangay San Roque.

Wala nakabantay ang suspek nga nakuhaan og hulagway sa biktima ang plate number sa motorsiklo samtang nagpagasolina ug gi-send kini niya sa iyahang mama.

Nagpakitabang dayon ang biktima sa Mambaling Police Station 11 ug daling nagpahigayon og hot pursuit operation pinangulohan ni Police Lieutenant Lyndon Mondragon.

Ang motorsiklo nga giabangan ra adunay GPS ug na-trace sa Transcentral Highway sa Lungsod sa Balamban ug didto nadakpan ang suspek.

Nabawi gikan niya ang IPhone 11 sa biktima nga nagkantidad og P20,000, screw driver ug ang motor nga gigamit sa paghimo sa krimen, apan ang P2500 nga kwarta nagasto na niini.

Ang suspek miangkon apan nangatarungan nga ibayad unta niya sa iyahang tuition fee ang kwarta.

 Iyaha sab giklaro nga sa dihang gisultihan siya sa biktima nga buhaton niini ang tanan, nagtuo siyang bukas sa kabubut-on niini nga makighilawas kaniya.

"Paghuman, ako pa siya gihatod kay wala na baya siya'y kwarta...Layo pa ra ba ilaha...Pero wala gyud sa akong plano tulison siya, nadala lang ko sa akong problema," matud sa suspek kinsa nangangkon nga nakonsensiya siya ug plano gyud niya untang iuli nalang ang cellphone apan pagtan-aw niya naka lock kini.

Si Police Lieutenant Colonel Maria Theresa Macatangay, Deputy City Director for Operations ug tigpamaba sa Cebu City Police mibutyag nga giandam na nila ang kasong ipasaka batok sa suspetsado. 

Gidayeg sa CCPO ang Mambaling Police Station 11 sa paspas nga pagsulbad sa krimen. - Romeo D. Marantal, IBM  BANAT NEWS