PRO-7 nipalawom sa imbestigasyon kabahin sa kalabera nga napalgan

CEBU, Philippines — Gipalawoman sa Police Regional Office (PRO) -7 ang imbestigasyon kabahin sa pagkadiskubre sa kalabera sa usa ka tawo nga nahibaw-an nga usa ka babaye ug giila kini iyahang mga kabanay diha sa Lungsod sa Argao.

Matud ni Police Lieutenant Colonel Gerard Ace Pelare, tigpamaba ni PRO-7 nga gikonsidera nila ang pamahayag sa nagpailang kabanay apan ipaubos gihapon nila sa examination sa Regional Forensic Unit-7 ang mga bukog kini aron matumbok ang identity sa maong kalabera ug madeterminar ang gikamatyan niini.

Sa pagkakaron, giproseso ug gi-examine na sa forensic unit ang mga bukog.

Nagkanayon si Pelare nga adunay gibutang nga investigator on case aron masiguro nga mabutyag gyud ang tinud-anay nga nahitabo sa maong nakit-an nga kalabera.

"Tanang anggulo sa imbestigasyon kay ug mahinumdom mo naay mga nakita didto nga mga objective evidence pod along with the remains so these are being considered by the investigator on case", padayag ni Pelare.

Nihatag usab og kamandoan si Police Brigadier General Anthony Aberin, direktor sa PRO-7 ngadto sa Cebu Police Provincial Office nga mohimo og komprehensibong imbestigasyon aron mahatagan og kahayag ang maong panghitabo. (BANAT NEWS)